churā ke muTThī meñ dil ko chhupā.e baiThe haiñ

bahānā ye hai ki mehñdī lagā.e baiThe haiñ

chura ke muTThi mein dil ko chhupae baiThe hain

bahana ye hai ki mehndi lagae baiThe hain

kyā hamārī namāz kyā roza

baḳhsh dene ke sau bahāne haiñ

kya hamari namaz kya roza

baKHsh dene ke sau bahane hain

kuchh arz-e-tamannā meñ shikva na sitam kā thā

maiñ ne to kahā kyā thā aur aap ne kyā jaanā

kuchh arz-e-tamanna mein shikwa na sitam ka tha

main ne to kaha kya tha aur aap ne kya jaana

ġhairoñ ko bhalā samjhe aur mujh ko burā jaanā

samjhe bhī to kyā samjhe jaanā bhī to kyā jaanā

ghairon ko bhala samjhe aur mujh ko bura jaana

samjhe bhi to kya samjhe jaana bhi to kya jaana

shaġhl-e-ulfat ko jo ahbāb burā kahte haiñ

kuchh samajh meñ nahīñ aatā ki ye kyā kahte haiñ

shaghl-e-ulfat ko jo ahbab bura kahte hain

kuchh samajh mein nahin aata ki ye kya kahte hain

itnā mardūd huuñ ki Dar hai mujhe

qabr se pheñk de zamīñ na kahīñ

itna mardud hun ki Dar hai mujhe

qabr se phenk de zamin na kahin

ye jo chupke se aa.e baiThe haiñ

laakh fitne uThā.e baiThe haiñ

ye jo chupke se aae baiThe hain

lakh fitne uThae baiThe hain

jaan insāñ kī lene vāloñ meñ

ek hai maut dūsrā hai ishq

jaan insan ki lene walon mein

ek hai maut dusra hai ishq

apnī kashtī kā hai ḳhudā hāfiz

pīchhe tūfāñ hai sāmne girdāb

apni kashti ka hai KHuda hafiz

pichhe tufan hai samne girdab

kisī se ishq apnā kyā chhupā.eñ

mohabbat Tapkī paḌtī hai nazar se

kisi se ishq apna kya chhupaen

mohabbat Tapki paDti hai nazar se

abr kī tīrgī meñ ham ko to

sūjhtā kuchh nahīñ sivā.e sharāb

abr ki tirgi mein hum ko to

sujhta kuchh nahin siwae sharab

kyuuñ paas mire aa kar yuuñ baiThe ho muñh phere

kyā lab tire misrī haiñ maiñ jin ko chabā jaatā

kyun pas mere aa kar yun baiThe ho munh phere

kya lab tere misri hain main jin ko chaba jata

raal Tapkegī shaiḳh-sāhib kī

na dikhāo sharāb kī sūrat

ral Tapkegi shaiKH-sahib ki

na dikhao sharab ki surat

aa hī kuudā thā dair meñ vaa.iz

ham ne Taalā ḳhudā ḳhudā kar ke

aa hi kuda tha dair mein waiz

hum ne Tala KHuda KHuda kar ke

na us ke lab ko faqat laal kah ke ḳhatm karo

abhī to us meñ bahut sī hai guftugū baaqī

na us ke lab ko faqat lal kah ke KHatm karo

abhi to us mein bahut si hai guftugu baqi

tumheñ gar ḳhush-zabāñ honā hai sāhab

to lo muñh meñ zarā merī zabāñ ko

tumhein gar KHush-zaban hona hai sahab

to lo munh mein zara meri zaban ko

hazāroñ ghar hue haiñ is se vīrāñ

rahe ābād sarkār-e-mohabbat

hazaron ghar hue hain is se viran

rahe aabaad sarkar-e-mohabbat

vo mere ghar ke sāmne se jaa.eñ is tarah

ai ham-nashīñ raqīb kā ghar to udhar nahīñ

wo mere ghar ke samne se jaen is tarah

ai ham-nashin raqib ka ghar to udhar nahin

jaan dene ke sivā aur bhī tadbīr karūñ

varna ye baat to ham us se sadā kahte haiñ

jaan dene ke siwa aur bhi tadbir karun

warna ye baat to hum us se sada kahte hain

shauq se shauq hai kuchh manzil kā

rāhbar se bhī baḌhe jaate haiñ

shauq se shauq hai kuchh manzil ka

rahbar se bhi baDhe jate hain

tūfān-e-jahl ne mirā jauhar miTā diyā

maiñ ik kitāb ḳhuub huuñ par āb-dīda huuñ

tufan-e-jahl ne mera jauhar miTa diya

main ek kitab KHub hun par aab-dida hun

aamad aamad ḳhizāñ kī hai shāyad

gul shagufta huā chaman meñ hai

aamad aamad KHizan ki hai shayad

gul shagufta hua chaman mein hai

ab raqīb-e-bul-havas haiñ ishq-bāz

dil lagāne se bhī nafrat ho ga.ī

ab raqib-e-bul-hawas hain ishq-baz

dil lagane se bhi nafrat ho gai

ye kyā ki hamīñ marte raheñ lutf to jab hai

tāsīr-e-mohabbat jo idhar ho to udhar bhī

ye kya ki hamin marte rahen lutf to jab hai

tasir-e-mohabbat jo idhar ho to udhar bhi

sahal ho garche adū ko magar us kā milnā

itnā maiñ ḳhuub samajhtā huuñ ki āsāñ to nahīñ

sahal ho garche adu ko magar us ka milna

itna main KHub samajhta hun ki aasan to nahin

na to sayyād kā khaTkā na ḳhizāñ kā dhaḌkā

ham ko vo chain qafas meñ hai ki bustāñ meñ nahīñ

na to sayyaad ka khaTka na KHizan ka dhaDka

hum ko wo chain qafas mein hai ki bustan mein nahin

na.e fitne jo uThte haiñ jahāñ meñ

salāheñ sab ye lete haiñ tumhīñ se

nae fitne jo uThte hain jahan mein

salahen sab ye lete hain tumhin se

tarashshoh haañ kare jis kī nahīñ par

mirī sau jaañ tasadduq us nahīñ par

tarashshoh han kare jis ki nahin par

meri sau jaan tasadduq us nahin par

kyuuñ merī būd-o-bāsh kī pursish hai har ghaḌī

tum to kaho ki rahte ho do do pahar kahāñ

kyun meri bud-o-bash ki pursish hai har ghaDi

tum to kaho ki rahte ho do do pahar kahan

zāhid piyāla thaam jhijhaktā hai kis liye

is muft kī sharāb ke piine se Dar nahīñ

zahid piyala tham jhijhakta hai kis liye

is muft ki sharab ke pine se Dar nahin

tālib-e-dost alag rahte haiñ sab se un ko

pās-e-asnām nahīñ ḳhvāhish-e-islām nahīñ

talib-e-dost alag rahte hain sab se un ko

pas-e-asnam nahin KHwahish-e-islam nahin

kaj-adā.ī ye sab hamīñ tak thī

ab zamāne ko inqalāb kahāñ

kaj-adai ye sab hamin tak thi

ab zamane ko inqalab kahan

sunā hāl-e-dil-e-'majrūh' shab ko

koī hasrat sī hasrat thī bayāñ meñ

suna haal-e-dil-e-'majruh' shab ko

koi hasrat si hasrat thi bayan mein

kuchh ho majrūh ghus chalo ghar meñ

aaj dar us kā hai khulā chaupaT

kuchh ho majruh ghus chalo ghar mein

aaj dar us ka hai khula chaupaT

us ke dar par to kisī kī bhī rasā.ī na huī

le ke sayyād qafas ko jo idhar se guzrā

us ke dar par to kisi ki bhi rasai na hui

le ke sayyaad qafas ko jo idhar se guzra

har ek jāntā hai ki mujh par nazar paḌī

kyā shoḳhiyāñ haiñ us nigah-e-sehr-kār meñ

har ek jaanta hai ki mujh par nazar paDi

kya shoKHiyan hain us nigah-e-sehr-kar mein

mire kis kaam kā hai baḳht-e-ḳhufta

ise rishvat meñ dūñgā pāsbāñ ko

mere kis kaam ka hai baKHt-e-KHufta

ise rishwat mein dunga pasban ko