sāmnā jab huā mahshar meñ to kuchh kah na sakā

mujh se dekhā na gayā un kā pareshāñ honā

samna jab hua mahshar mein to kuchh kah na saka

mujh se dekha na gaya un ka pareshan hona

nazar lagne kā un ke vāste ganDā banāne ko

bachā rakkhe haiñ maiñ ne taar kuchh apne garebāñ meñ

nazar lagne ka un ke waste ganDa banane ko

bacha rakkhe hain main ne tar kuchh apne gareban mein

kitne hī pā-e-sanam par kiye sajde maiñ ne

kabhī puurā na huā shauq jabīñ-sā.ī kā

kitne hi pa-e-sanam par kiye sajde main ne

kabhi pura na hua shauq jabin-sai ka

dekhā jo mujh ko pher ke muñh muskurā diye

bijlī girī taḌap ke dil-e-be-qarār par

dekha jo mujh ko pher ke munh muskura diye

bijli giri taDap ke dil-e-be-qarar par

hai gor-e-ġharībāñ meñ vahī 'shams' kā madfan

turbat jo koī dil ke dhaḌakne kī sadā de

hai gor-e-ghariban mein wahi 'shams' ka madfan

turbat jo koi dil ke dhaDakne ki sada de

aañkh saaqī se milī jaise hī mai-ḳhāne meñ

khiñch ke mai aa ga.ī paimāne se paimāne meñ

aankh saqi se mili jaise hi mai-KHane mein

khinch ke mai aa gai paimane se paimane mein

milte hī aañkh us fusūñ-gar se

dil gayā aur hameñ ḳhabar na huī

milte hi aankh us fusun-gar se

dil gaya aur hamein KHabar na hui

hue āġhāz-e-‘ishq hī meñ halāk

ġharq ham ho ga.e lab-e-sāhil

hue aaghaz-e-‘ishq hi mein halak

gharq hum ho gae lab-e-sahil

ḳhaak ke zarroñ se uf uf kī sadā aatī hai

merā afsāna-e-ġham qissa-e-māzī na huā

KHak ke zarron se uf uf ki sada aati hai

mera afsana-e-gham qissa-e-mazi na hua

sab zaḳhm haiñ hare hai lahū se qabā bhī surḳh

laayā hai rang josh-e-junūñ phir bahār meñ

sab zaKHm hain hare hai lahu se qaba bhi surKH

laya hai rang josh-e-junun phir bahaar mein

hashr meñ chhoḌ diyā dekh ke utrā huā muñh

aa chukā thā mire hāthoñ meñ garebāñ un kā

hashr mein chhoD diya dekh ke utra hua munh

aa chuka tha mere hathon mein gareban un ka

kabhī duniyā meñ phir na hogī sahar

hijr kī shab agar sahar na huī

kabhi duniya mein phir na hogi sahar

hijr ki shab agar sahar na hui

aa.e 'adam se gulshan-e-hastī kī sair ko

dāman ulajh gayā hai yahāñ ḳhār-zār meñ

aae 'adam se gulshan-e-hasti ki sair ko

daman ulajh gaya hai yahan KHar-zar mein

mai-noshī haq ne dār-e-baqā meñ bhī kī halāl

kahtā hai shaiḳh dār-e-fanā meñ harām hai

mai-noshi haq ne dar-e-baqa mein bhi ki halal

kahta hai shaiKH dar-e-fana mein haram hai

dam nikaltā hai tirī zulf ke saudā.ī kā

jhilmilātā hai sitāra shab-e-tanhā.ī kā

dam nikalta hai teri zulf ke saudai ka

jhilmilata hai sitara shab-e-tanhai ka

ai ḳhushā 'ahd-e-'adam fikr se āzād the ham

ek din bhī na yahāñ qaid-e-mihan se nikle

ai KHusha 'ahd-e-'adam fikr se aazad the hum

ek din bhi na yahan qaid-e-mihan se nikle

qaabū meñ rakkhe ablaq-e-lail-o-nahār ko

dekhā na maiñ ne aisā kisī shahsavār ko

qabu mein rakkhe ablaq-e-lail-o-nahaar ko

dekha na main ne aisa kisi shahsawar ko

chārāgar kyā samajh sakeñge bhalā

dard kaisā hai aur davā kyā hai

chaaragar kya samajh sakenge bhala

dard kaisa hai aur dawa kya hai

āñkheñ lagī haiñ dar pe nikaltā nahīñ hai dam

Thahrī huī hai ruuh tire intizār meñ

aankhen lagi hain dar pe nikalta nahin hai dam

Thahri hui hai ruh tere intizar mein

koī vīrāna mire zauq ke qābil na milā

ab kahāñ le ke mujhe jā.egī vahshat merī

koi virana mere zauq ke qabil na mila

ab kahan le ke mujhe jaegi wahshat meri

dekhā jo din ko us ne sū-e-charḳh-e-be-madār

sonā utar gayā varaq-e-āftāb kā

dekha jo din ko us ne su-e-charKH-e-be-madar

sona utar gaya waraq-e-aftab ka

hai 'ajab tarh kī ye kashmakash-e-maut-o-hayāt

na maiñ jiine pe huuñ raazī na vo mar jaane par

hai 'ajab tarh ki ye kashmakash-e-maut-o-hayat

na main jine pe hun raazi na wo mar jaane par

muskurāhaT lab-e-nāzuk pe nigāheñ nīchī

kis se sīkhā hai ye andāz dil-ārā.ī kā

muskurahaT lab-e-nazuk pe nigahen nichi

kis se sikha hai ye andaz dil-arai ka

ḳhauf-e-mahshar na rahā dil meñ jo dekhā maiñ ne

pusht par mere gunāhoñ ke hai rahmat us kī

KHauf-e-mahshar na raha dil mein jo dekha main ne

pusht par mere gunahon ke hai rahmat us ki

kuchh na pūchho darāzī-e-shab-e-hijr

kaT ga.ī 'umr aur sahar na huī

kuchh na puchho daraazi-e-shab-e-hijr

kaT gai 'umr aur sahar na hui

lazzat-e-zindagī vo kyā jaane

jis ko dard-e-jigar nahīñ hotā

lazzat-e-zindagi wo kya jaane

jis ko dard-e-jigar nahin hota

sho'la-e-'ishq agar dil meñ farozāñ ho jaa.e

baḌh ke ye qatra-e-ḳhūñ mahr-e-daraḳhshāñ ho jaa.e

sho'la-e-'ishq agar dil mein farozan ho jae

baDh ke ye qatra-e-KHun mahr-e-daraKHshan ho jae

bijlī girā.ī tuur jalāyā uḌaa.e hosh

itnā jalāl ik arinī ke savāl par

bijli girai tur jalaya uDae hosh

itna jalal ek arini ke sawal par

dekhā jo maiñ ne nāma-e-ā'māl hashr meñ

qissa likhā thā mere aur un ke shabāb kā

dekha jo main ne nama-e-a'mal hashr mein

qissa likha tha mere aur un ke shabab ka

fitna-zā vahshat-fazā dām-e-qazā hote ga.e

jis qadar baḌhte ga.e gesū balā hote ga.e

fitna-za wahshat-faza dam-e-qaza hote gae

jis qadar baDhte gae gesu bala hote gae

hook jab dil se uThī zabt-e-fuġhāñ kar na sakā

raaz is ghar kā jo thā mujh se vo maḳhfī na huā

hook jab dil se uThi zabt-e-fughan kar na saka

raaz is ghar ka jo tha mujh se wo maKHfi na hua