اس کے ماں باپ نہیں ہیں شاید

ورنہ اس میں کہیں بچہ ہوتا

وہ نیند ملی ہے کہ جو پوری نہیں ہوتی

وہ خواب ملا ہے کہ جو معذور ہوا ہے

بخش مجھ کو نہ ادھوری کوئی نعمت مولا

یا تو دریا ہی دے پورا یا تو صحرا سارا

اس دفعہ تو زندگی جلدی میں تھی

کہہ دو اگلی بار فرصت میں ملے

رنج یوں راہ مسافت میں ملے

کچھ کمائے کچھ وراثت میں ملے

محبت فقط لفظ تھا ایک خالی

یہ کس نے کہا تھا معانی ملا دو

نہ جذبات سے یہ سفر طے ہوا

نہ دل سے کبھی یہ زباں تک گئے

پیار آنکھوں سے چھلکتا ہی ہے

دل کے پیمانے میں سارا نہ رہے

نشان راہی کے راہوں پہ ہو نہ ہو لیکن

نشان راہوں کے اکثر ملیں گے راہی پہ

رہ گئے کتنے کردار بھیتر مرے

میرے بھیتر مرا قافلہ رہ گیا

کہ حاصل یہی موسموں کا رہا

بہاروں کے پتے خزاں تک گئے

فاصلوں میں رہا قربتوں کا گماں

قربتوں میں کہیں فاصلہ رہ گیا

رہوں گا جشن زدہ میں بہانے کیا کم ہیں

تو رقص دیکھنا میرا مری تباہی پہ

کیا ضروری ہے یہ اقرار کی محتاج رہے

ہم محبت کو یوں لاچار کریں بھی کہ نہیں

اندھیروں اجالوں کی ہے یہ لڑائی

بجھاؤ گے تم ہم جلایا کریں گے

تم نے پودے کو تھا سائے میں رکھا

دھوپ میں رکھتے تو زندہ ہوتا

دھوپ بڑھنے کے جو آثار ہوئے

کتنے سائے کے طرف دار ہوئے

کچھ وقت ذرا اور نہر دودھ کی لے گی

فرہاد کو تیشہ نہیں منظور ہوا ہے

ہے وجود اس کا جو کاغذ پہ کرے ثابت یہ

بعض اوقات ہے کاغذ بڑا اوقات سے اب

یہی دائمی مشغلہ ہے ہمارا

نئی چیز لے لو پرانی ملا دو