ye kaise marhale meñ phañs gayā hai merā ghar mālik

agar chhat ko bachā bhī luuñ to phir dīvār jaatī hai

ye kaise marhale mein phans gaya hai mera ghar malik

agar chhat ko bacha bhi lun to phir diwar jati hai

maiñ ḳhud ko dekhūñ agar dūsre kī āñkhoñ se

mileñgī ḳhāmiyāñ apne hī shah-kāroñ meñ

main KHud ko dekhun agar dusre ki aankhon se

milengi KHamiyan apne hi shah-karon mein

ho lene do bārish ham bhī ro leñge

dil meñ haiñ kuchh zaḳhm purāne dho leñge

ho lene do barish hum bhi ro lenge

dil mein hain kuchh zaKHm purane dho lenge

ḳhat ho koī kitāb ho yā dil kā zaḳhm ho

jo bhī hai mere paas nishānī usī kī hai

KHat ho koi kitab ho ya dil ka zaKHm ho

jo bhi hai mere pas nishani usi ki hai

ḳhatā us kī muāfī se baḌī hai

maiñ kyā kartā sazā denī paḌī hai

KHata us ki muafi se baDi hai

main kya karta saza deni paDi hai

ye baat sach hai ki vo zindagī nahīñ merī

magar vo mere liye zindagī se kam bhī nahīñ

ye baat sach hai ki wo zindagi nahin meri

magar wo mere liye zindagi se kam bhi nahin

sunā hai dhuup ko ghar lauTne kī jaldī hai

vo aaj vaqt se pahle hī shaam kar degī

suna hai dhup ko ghar lauTne ki jaldi hai

wo aaj waqt se pahle hi sham kar degi

maiñ tujh se jhuk ke milā huuñ magar ye dhyān rahe

baḌā nahīñ huuñ magar tujh se qad meñ kam bhī nahīñ

main tujh se jhuk ke mila hun magar ye dhyan rahe

baDa nahin hun magar tujh se qad mein kam bhi nahin

koī shikva nahīñ ham ko kisī se

ḳhud apnī zaat ham ko chhal rahī hai

koi shikwa nahin hum ko kisi se

KHud apni zat hum ko chhal rahi hai

aatā rahā huuñ yaad maiñ us ko tamām umr

is zāviye se ishq meñ nākām kab huā

aata raha hun yaad main us ko tamam umr

is zawiye se ishq mein nakaam kab hua

āsmāñ tū ne chhupā rakkhā hai sūraj ko kahāñ

kyuuñ kalā.ī meñ tirī band ghaḌī hai ab bhī

aasman tu ne chhupa rakkha hai suraj ko kahan

kyun kalai mein teri band ghaDi hai ab bhi

ġhazal kahne meñ yuuñ to koī dushvārī nahīñ hotī

magar ik mas.ala ye hai ki meyārī nahīñ hotī

ghazal kahne mein yun to koi dushwari nahin hoti

magar ek masala ye hai ki meyari nahin hoti