عاشق مزاج رہتے ہیں ہر وقت تاک میں

سینہ کو اس طرح سے ابھارا نہ کیجیے

جو منہ سے کہتے ہیں کچھ اور کرتے ہیں کچھ اور

وہی زمانہ میں کچھ اختیار رکھتے ہیں

شیخ چل تو شراب خانے میں

میں تجھے آدمی بنا دوں گا

ترا آنا مرے گھر ہو گیا گھر غیر کے جانا

مجھے معلوم تھی اس خواب کی تعبیر پہلے سے

پھاڑ کر خط اس نے قاصد سے کہا

کوئی پیغام زبانی اور ہے

پیتے ہیں جو شراب مسجد میں

ایسے لوگوں کو پارسا کہیے

کالی گھٹا کب آئے گی فصل بہار میں

آنکھیں سفید ہو گئیں اس انتظار میں

چاہنے والوں کو چاہا چاہئے

جو نہ چاہے پھر اسے کیا چاہئے

تم جاؤ رقیبوں کا کرو کوئی مداوا

ہم آپ بھگت لیں گے کہ جو ہم پہ بنی ہے

کھولا دروازہ سمجھ کر مجھ کو غیر

کھا گئے دھوکا مری آواز سے

کعبہ کو اگر مانیں کہ اللہ کا گھر ہے

بت خانہ میں بھی شیخ نہیں کوئی مکیں اور

اے شیخ اپنا جبۂ اقدس سنبھالیے

مست آ رہے ہیں چاک گریباں کیے ہوئے

زاہد مری سمجھ میں تو دونوں گناہ ہیں

تو بت شکن ہوا جو میں توبہ شکن ہوا

گو ہم شراب پیتے ہمیشہ ہیں دے کے نقد

لیکن مزا کچھ اور ہی پایا ادھار میں

دھر کے ہاتھ اپنا جگر پر میں وہیں بیٹھ گیا

جب اٹھے ہاتھ وہ کل رکھ کے کمر پر اپنا

لٹکتے دیکھا سینہ پر جو تیرے تار گیسو کو

اسے دیوانے وحشت میں ترا بند قبا سمجھے

ڈرائے گی ہمیں کیا ہجر کی اندھیری رات

کہ شمع بیٹھے ہیں پہلے ہی ہم بجھائے ہوئے

کس سے دوں تشبیہ میں زلف مسلسل کو تری

فکر ہے کوتاہ اور مضموں بہت ہے دور کا

ایک تیر نظر ادھر مارو

دل ترستا ہے جاں ترستی ہے

بھول کر لے گیا سوئے منزل

ایسے رہزن کو رہنما کہیے

زاہد نماز بھولا ادھر دیکھ کر تجھے

برہم بتوں سے اپنے ادھر برہمن ہوا

آگے میرے نہ تیکھی مار اے شیخ

رات کا ماجرا سنا دوں گا

مزہ دیکھا کسی کو اے پری رو منہ لگانے کا

اب آئینہ بھی کہتا ہے کہ میں مد مقابل ہوں

اے شیخ یہ جو مانیں کعبہ خدا کا گھر ہے

بت خانہ میں بتا تو پھر کون جلوہ گر ہے

خیال ناف میں زلفوں نے مشکیں باندھ دیں میری

شناور کس طرح گرداب سے بے دست و پا نکلے

ایک مدت میں بڑھایا تو نے ربط

اب گھٹانا تھوڑا تھوڑا چاہئے

نہ چلو مجھ سے تم رقیبو چال

انگلیوں پر تمہیں نچا دوں گا

ہیں وہی انساں اٹھاتے رنج جو ہوتے ہی کج

ٹیڑھی ہو کر ڈوبتی ہے ناؤ اکثر آب میں

گریباں ہم نے دکھلایا انہوں نے زلف دکھلائی

ہمارا سمجھے وہ مطلب ہم ان کا مدعا سمجھے

جب بوسہ لے کے مدعا میں نے بیاں کیا

بولے زیادہ پاؤں پسارا نہ کیجیے