ḳhud charāġhoñ ko andheroñ kī zarūrat hai bahut

raushnī ho to unheñ log bujhāne lag jaa.eñ

KHud charaghon ko andheron ki zarurat hai bahut

raushni ho to unhen log bujhane lag jaen

ik yahī soch bichhaḌne nahīñ detī tujh se

ham tujhe baad meñ phir yaad na aane lag jaa.eñ

ek yahi soch bichhaDne nahin deti tujh se

hum tujhe baad mein phir yaad na aane lag jaen

abhī se chhoTī huī jā rahī haiñ dīvāreñ

abhī to beTī zarā sī mirī baḌī huī hai

abhi se chhoTi hui ja rahi hain diwaren

abhi to beTi zara si meri baDi hui hai

mere aane kī ḳhabar sun ke vo dauḌā aatā

us ko pahuñchā nahīñ paiġhām yahī lagtā hai

mere aane ki KHabar sun ke wo dauDa aata

us ko pahuncha nahin paigham yahi lagta hai

agar bichhaḌne kā us se koī malāl nahīñ

'shabānā' ashk se phir aañkh kyuuñ bharī huī hai

agar bichhaDne ka us se koi malal nahin

'shabana' ashk se phir aankh kyun bhari hui hai

mujh ko bhī kar degā rusvā vo zamāne bhar meñ

ḳhud bhī ho jā.egā badnām yahī lagtā hai

mujh ko bhi kar dega ruswa wo zamane bhar mein

KHud bhi ho jaega badnam yahi lagta hai

ye to sochā hī nahīñ us ko judā karte hue

chun liyā hai ġham bhī ḳhushiyoñ ko rihā karte hue

ye to socha hi nahin us ko juda karte hue

chun liya hai gham bhi KHushiyon ko riha karte hue

maiñ haath bāñdhe hue lauT aa.ī huuñ ghar meñ

ki mere pars meñ ik aarzū marī huī hai

main hath bandhe hue lauT aai hun ghar mein

ki mere pars mein ek aarzu mari hui hai