خود چراغوں کو اندھیروں کی ضرورت ہے بہت

روشنی ہو تو انہیں لوگ بجھانے لگ جائیں

اک یہی سوچ بچھڑنے نہیں دیتی تجھ سے

ہم تجھے بعد میں پھر یاد نہ آنے لگ جائیں

ابھی سے چھوٹی ہوئی جا رہی ہیں دیواریں

ابھی تو بیٹی ذرا سی مری بڑی ہوئی ہے

میرے آنے کی خبر سن کے وہ دوڑا آتا

اس کو پہنچا نہیں پیغام یہی لگتا ہے

اگر بچھڑنے کا اس سے کوئی ملال نہیں

شبانہؔ اشک سے پھر آنکھ کیوں بھری ہوئی ہے

مجھ کو بھی کر دے گا رسوا وہ زمانے بھر میں

خود بھی ہو جائے گا بدنام یہی لگتا ہے

یہ تو سوچا ہی نہیں اس کو جدا کرتے ہوئے

چن لیا ہے غم بھی خوشیوں کو رہا کرتے ہوئے

میں ہاتھ باندھے ہوئے لوٹ آئی ہوں گھر میں

کہ میرے پرس میں اک آرزو مری ہوئی ہے