sundartā kī baat ho terā zikr na aa.e

maulā! aisī priit ko dīmak hī lag jaa.e

sundarta ki baat ho tera zikr na aae

maula! aisi prit ko dimak hi lag jae

tujh ko DhūñDā chaar sū jaanī ye haq baat

tujh ko mujh meñ khojtī ḳhud hī merī zaat

tujh ko DhunDa chaar su jaani ye haq baat

tujh ko mujh mein khojti KHud hi meri zat

āñkhoñ ke dar band the qaid the sab lamhāt

us ke dil ke shahr meñ guzrī phir ik raat

aankhon ke dar band the qaid the sab lamhat

us ke dil ke shahr mein guzri phir ek raat

ruup alag har shahr kā alag hai būd-o-bāsh

lekin duniyā ghuum lī vahī rahā ākāsh

rup alag har shahr ka alag hai bud-o-bash

lekin duniya ghum li wahi raha aakash

muul chukāyā jal liyā bujhī na man kī pyaas

dhan daulat kab pā sake premī kā vishvās

mul chukaya jal liya bujhi na man ki pyas

dhan daulat kab pa sake premi ka wishwas

har chehra hai muḳhtalif sab meñ tirā jamāl

kaise lā.ūñ DhūñD kar tirī koī misāl

har chehra hai muKHtalif sab mein tera jamal

kaise laun DhunD kar teri koi misal

do pal rukne ke liye kaisī aan aur baan

banjāroñ ko ek hai bastī aur shamshān

do pal rukne ke liye kaisi aan aur ban

banjaron ko ek hai basti aur shamshan

sohbat āḳhir kar ga.ī kaam thā jo dushvār

shīshe jaisā ho gayā patthar kā kirdār

sohbat aaKHir kar gai kaam tha jo dushwar

shishe jaisa ho gaya patthar ka kirdar

duniyā kī is bhiiḌ meñ kaisā hai sanjog

zanjīroñ meñ qaid haiñ soche samjhe log

duniya ki is bhiD mein kaisa hai sanjog

zanjiron mein qaid hain soche samjhe log

bhītar apne jhāñk kar jogī huā udaas

paayā paanī har jagah khoj na paayā pyaas

bhitar apne jhank kar jogi hua udas

paya pani har jagah khoj na paya pyas