judā.ī se ziyāda jān-levā

mohabbat meñ mohabbat kī kamī hai

judai se ziyaada jaan-lewa

mohabbat mein mohabbat ki kami hai

vo mire bas ko kaise samjhegā

jo mirī bebasī ko samjhā nahīñ

wo mere bas ko kaise samjhega

jo meri bebasi ko samjha nahin

ye jahāñ ek tamāshā hai sabhī kahte haiñ

tum na hote to ise ham bhī tamāshā kahte

ye jahan ek tamasha hai sabhi kahte hain

tum na hote to ise hum bhi tamasha kahte

kabhī ye ġham thā ki samjhā nahīñ koī ham ko

aur ab ye Dar ki kisī ne samajh liyā hī na ho

kabhi ye gham tha ki samjha nahin koi hum ko

aur ab ye Dar ki kisi ne samajh liya hi na ho

itne Duube hue the jiine meñ

muddatoñ zindagī ko samjhā nahīñ

itne Dube hue the jine mein

muddaton zindagi ko samjha nahin

phuul ko chuum ke gulzār banā saktī hai

aisī ik baat hai hoñToñ kī pazīrā.ī meñ

phul ko chum ke gulzar bana sakti hai

aisi ek baat hai honTon ki pazirai mein

aise bhaTak rahā hai ḳharābe meñ aadmī

jaise use kabhī bhī hidāyat nahīñ milī

aise bhaTak raha hai KHarabe mein aadmi

jaise use kabhi bhi hidayat nahin mili

āġhāz hī nahīñ thā so anjām bhī nahīñ

vo gum-shuda hoñ jis kā koī naam bhī nahīñ

aaghaz hi nahin tha so anjam bhi nahin

wo gum-shuda hon jis ka koi nam bhi nahin

aisā chehra ki aañkh bol uThī

mo.ajiza aa.ine ke ba.ad kā hai

aisa chehra ki aankh bol uThi

moajiza aaine ke baad ka hai

kitāb-e-ishq meñ saa.e kā matlab

dar-o-dīvār kā saaya nahīñ hai

kitab-e-ishq mein sae ka matlab

dar-o-diwar ka saya nahin hai

hai mas.ale kā hal ye usī dar pe jā.ūñ maiñ

jis dar pe ab maiñ jaane ke qābil nahīñ rahā

hai masale ka hal ye usi dar pe jaun main

jis dar pe ab main jaane ke qabil nahin raha

husn aisā thā ki har ik aa.inā kam paḌ gayā

aa.ina kyā umr bhar kā dekhnā kam paḌ gayā

husn aisa tha ki har ek aaina kam paD gaya

aaina kya umr bhar ka dekhna kam paD gaya

us ko sajda na kaho

ye to aadat hai miyāñ

us ko sajda na kaho

ye to aadat hai miyan

ik fikr lagī rahtī hai duniyā kī hamesha

har chand ise ham ne banāyā bhī nahīñ hai

ek fikr lagi rahti hai duniya ki hamesha

har chand ise hum ne banaya bhi nahin hai

dil vāloñ se sunte the kabhī qissa-e-duniyā

ab dil kī kahānī bhī sunāte haiñ adākār

dil walon se sunte the kabhi qissa-e-duniya

ab dil ki kahani bhi sunate hain adakar

phir aadmī havas se bhī aage nikal gayā

phir aadmī ke kaam na aayā gunāh tak

phir aadmi hawas se bhi aage nikal gaya

phir aadmi ke kaam na aaya gunah tak

khultā hai har ik shaḳhs ke qāmat ke barābar

ye dil hai koī kaaTh kā darvāza nahīñ hai

khulta hai har ek shaKHs ke qamat ke barabar

ye dil hai koi kaTh ka darwaza nahin hai

ajab hī aag hai dil kī ki is meñ

vahī jaltā hai jo jaltā nahīñ hai

ajab hi aag hai dil ki ki is mein

wahi jalta hai jo jalta nahin hai

chhoTī sī ek baat mirī phailtī ga.ī

ya.anī mire ḳhayāl meñ barakat ziyāda hai

chhoTi si ek baat meri phailti gai

yani mere KHayal mein barakat ziyaada hai

dil-e-tabāh meñ ābād hai zamāne se

ik aisī baat jo khultī hai muskurāne se

dil-e-tabah mein aabaad hai zamane se

ek aisi baat jo khulti hai muskurane se

vo dard uThā dil meñ ki jis dard kā darmāñ

gar ho na pas-e-lafz to miltā hai sar-e-dār

wo dard uTha dil mein ki jis dard ka darman

gar ho na pas-e-lafz to milta hai sar-e-dar

kisī nigāh meñ itnā Thahar ke aa.ī hai

ye kā.enāt bahut ban-sañvar ke aa.ī hai

kisi nigah mein itna Thahar ke aai hai

ye kaenat bahut ban-sanwar ke aai hai

bahut Dartā thā rone se

so ban kar muttaqī royā

bahut Darta tha rone se

so ban kar muttaqi roya

dard thā haijān thā par aañkh meñ aañsū na the

jaise dil tak aate aate hādisa kam paḌ gayā

dard tha haijaan tha par aankh mein aansu na the

jaise dil tak aate aate hadisa kam paD gaya

bikharne se bahut pahle jise kuchh bhī nahīñ kahte

bikharne se zarā pahle use shīrāza kahte haiñ

bikharne se bahut pahle jise kuchh bhi nahin kahte

bikharne se zara pahle use shiraaza kahte hain

kisī lāshe pe ye bād-e-sabā kahtī huī guzrī

shahīd-e-ishq hai is ke lahū ko taaza kahte haiñ

kisi lashe pe ye baad-e-saba kahti hui guzri

shahid-e-ishq hai is ke lahu ko taza kahte hain

maiñ to laa.eq nahīñ thā shar ke bhī

rakh diye us ne ḳhair-o-shar mujh meñ

main to laeq nahin tha shar ke bhi

rakh diye us ne KHair-o-shar mujh mein

ḳhvāhish se kab hai terī talab aarzū se hai

ik samt se nahīñ ye ġhazab chār-sū se hai

KHwahish se kab hai teri talab aarzu se hai

ek samt se nahin ye ghazab chaar-su se hai

aañkh se kyā maiñ to apne dil se bāhar ho gayā

raqs hī aisā thā har ik dā.era kam paḌ gayā

aankh se kya main to apne dil se bahar ho gaya

raqs hi aisa tha har ek daera kam paD gaya

ā.īn-e-ishq yuuñ bhī badalnā thā ek din

jo baat vasl se thī vo ab guftugū se hai

aain-e-ishq yun bhi badalna tha ek din

jo baat wasl se thi wo ab guftugu se hai

hamāre daur meñ dil bhī hai chhoTā

baḌā hai kuchh to bas ibrat baḌī hai

hamare daur mein dil bhi hai chhoTa

baDa hai kuchh to bas ibrat baDi hai

gayā hai jab kabhī dil par gayā hai

ye merā haath mushkil par gayā hai

gaya hai jab kabhi dil par gaya hai

ye mera hath mushkil par gaya hai