sochā thā lauT aa.egā apnā samajh ke vo

us ko gila hai mujh ko pukārā nahīñ gayā

socha tha lauT aaega apna samajh ke wo

us ko gila hai mujh ko pukara nahin gaya

zindagī pūchh na baiThe tire baare meñ kahīñ

terī tasvīr banāte hue Dar lagtā hai

zindagi puchh na baiThe tere bare mein kahin

teri taswir banate hue Dar lagta hai

hañste hue chehroñ se hameñ hotī hai vahshat

ham log udāsī ke shajar DhūñD rahe haiñ

hanste hue chehron se hamein hoti hai wahshat

hum log udasi ke shajar DhunD rahe hain

mujh ko sukūñ meñ dekh ke hairat na ho tujhe

ye soch ke maiñ zaḳhm koī sil nahīñ rahā

mujh ko sukun mein dekh ke hairat na ho tujhe

ye soch ke main zaKHm koi sil nahin raha

jab tū hī dekhne ko mayassar nahīñ hameñ

āñkhoñ ko rakh na deñ kahīñ bāhar nikāl ke

jab tu hi dekhne ko mayassar nahin hamein

aankhon ko rakh na den kahin bahar nikal ke

bas is ḳhayāl se kahīñ duniyā na dekh le

likh kar tumhārā naam miTānā paḌā hameñ

bas is KHayal se kahin duniya na dekh le

likh kar tumhaara nam miTana paDa hamein

vo khiḌkī ab aur kisī ko taktī hai

maiñ ne bhī us galī meñ jaanā chhoḌ diyā

wo khiDki ab aur kisi ko takti hai

main ne bhi us gali mein jaana chhoD diya

is darja mujhe 'ishq ne mazbūt kiyā hai

hañs hañs ke maiñ sah letā huuñ nuqsān vaġhaira

is darja mujhe 'ishq ne mazbut kiya hai

hans hans ke main sah leta hun nuqsan waghaira

chaupāl apne gaañv kī vīrān ho ga.ī

tum ne daraḳht kaaT ke achchhā nahīñ kiyā

chaupal apne ganw ki viran ho gai

tum ne daraKHt kaT ke achchha nahin kiya