yuuñ muskurā ke tark-e-ta.alluq kī guftugū

aisā sitam ki jis pe karam kā gumāñ rahe

yun muskura ke tark-e-talluq ki guftugu

aisa sitam ki jis pe karam ka guman rahe

shikva na ho tasalsul-e-āh-o-fuġhāñ rahe

vo chāhte haiñ aag na bhaḌke dhuāñ rahe

shikwa na ho tasalsul-e-ah-o-fughan rahe

wo chahte hain aag na bhaDke dhuan rahe

qurbat meñ aa paḌe the qayāmat ke fāsle

tanhā the ham to qaul-o-qasam darmiyāñ rahe

qurbat mein aa paDe the qayamat ke fasle

tanha the hum to qaul-o-qasam darmiyan rahe

ḳhushbū-e-pairahan meñ basā hai ruvāñ ruvāñ

vo ham se laakh duur rahe juzv-e-jāñ rahe

KHushbu-e-pairahan mein basa hai ruwan ruwan

wo hum se lakh dur rahe juzw-e-jaan rahe