یاسر رضا آصف ، 25دسمبر 1984 کو پیرکریاں پاک پتن میں پیدا ہوئے اور اب بھی شہرِفرید ، پاک پتن میں مستقل سکونت اختیار کیے ہوئے ہیں۔ ابتدائی تعلیم پاک پتن میں ہی حاصل کی۔ میٹرک 1999 میں "دی پاک پتن ہائی سکول" سے کیا اور ایم فل اردو "دی یونیورسٹی آف لاہور"  پاک پتن کیمپس سے 2017 میں کیا۔ آپ کا ایم۔فل کا مقالہ "کاشف سجاد کی شاعری" کے عنوان سے 2020 میں چھپ چکا ہے۔آپ ڈی پی ایس ساہیوال میں بطور ایس ایس اردو ، تدریسی فرائض سر انجام دے رہے ہیں۔ شاعری کا باقاعدہ آغاز 2009 میں ڈاکٹر اظہر کمال کی شاگردی میں کیا۔ آپ کا شعری مجموعہ "جو گرہیں کھول دی جائیں" 2017 میں اشاعت پذیر ہوا۔ ادبی تنظیم "ادب قبیلہ" پاک پتن کے جنرل سیکرٹری ہیں۔ آپ نے شاعری اور نثر دونوں میں طبع آزمائی کی ہے۔ آپ کا سفر نامہ "راکا پوشی زندہ ہے" 2021 میں مثال پبلشرز سے شائع ہوا اور خوب داد و تحسین حاصل کی۔ افسانوی مجموعہ "سڑک کنارے" اور ہم عصر ادبیوں کے خاکے "سنہرے لوگ" اشاعت کے مراحل میں ہیں۔ آپ کی شاعری میں فطرت، معاشرت اور تصوف کا حسین امتزاج موجود ہے۔