nigāhoñ meñ jo manzar ho vahī sab kuchh nahīñ hotā

bahut kuchh aur bhī pyāre pas-e-dīvār hotā hai

nigahon mein jo manzar ho wahi sab kuchh nahin hota

bahut kuchh aur bhi pyare pas-e-diwar hota hai

jo chāhtā hai ki ban jaa.e vo baḌā shā.er

vo jā ke dostī gāñThe kisī mudīr ke saath

jo chahta hai ki ban jae wo baDa shaer

wo ja ke dosti ganThe kisi mudir ke sath

shauharoñ se bībayāñ laḌtī haiñ chhāpa-mār jañg

rābta un kā bhī kyā kashmīr kī vaadī se hai

shauharon se bibayan laDti hain chhapa-mar jang

rabta un ka bhi kya kashmir ki wadi se hai

jo apnā bhaa.ī hai rahtā hai vo paañv kī Thokar meñ

magar jorū kā bhaa.ī to gale kā haar hotā hai

jo apna bhai hai rahta hai wo panw ki Thokar mein

magar joru ka bhai to gale ka haar hota hai

pople muñh se chane khānā nahīñ mumkin huzūr

aa nahīñ saktī javānī lauT ke mājūn se

pople munh se chane khana nahin mumkin huzur

aa nahin sakti jawani lauT ke majun se

vahī sulūk zamāne ne mere saath kiyā

kiyā thā jaisā musharraf ne be-nazīr ke saath

wahi suluk zamane ne mere sath kiya

kiya tha jaisa musharraf ne be-nazir ke sath

ye rishvat ke haiñ paise din meñ kaise luuñ musalmāñ huuñ

maiñ le saktā nahīñ sar apne ye ilzām roze meñ

ye rishwat ke hain paise din mein kaise lun musalman hun

main le sakta nahin sar apne ye ilzam roze mein

jo baiThā hai bagulā bhagat kī tarah

vahī ham ko aslī shikārī lage

jo baiTha hai bagula bhagat ki tarah

wahi hum ko asli shikari lage

vo masjid ho ki mandir ho adab ho yā siyāsat ho

vahī hai jañg kursī kī vahī dastār kā jhagḌā

wo masjid ho ki mandir ho adab ho ya siyasat ho

wahi hai jang kursi ki wahi dastar ka jhagDa

siyāsat meñ aisī uchhal-kūd hai

ki har ek netā madārī lage

siyasat mein aisi uchhal-kud hai

ki har ek neta madari lage

vafūr-e-ishq ke jazbe se ho ga.ī sarshār

nikal paḌī hai murīdan jadīd piir ke saath

wafur-e-ishq ke jazbe se ho gai sarshaar

nikal paDi hai muridan jadid pir ke sath

chhiḌā jab un ke ghar jhagḌā to un kī aql chakrā.ī

jo suljhāte rahe the umr-bhar bāzār kā jhagḌā

chhiDa jab un ke ghar jhagDa to un ki aql chakrai

jo suljhate rahe the umr-bhar bazar ka jhagDa

ḳhabar kar do mohalle meñ agar chheḌā kisī ne bhī

usī dam maiñ machā saktā huuñ qatl-e-ām roze meñ

KHabar kar do mohalle mein agar chheDa kisi ne bhi

usi dam main macha sakta hun qatl-e-am roze mein

is zamāne kī ajab tishna-labī hai ai 'zafar'

pyaas us kī sirf bujhtī hai hamāre ḳhuun se

is zamane ki ajab tishna-labi hai ai 'zafar'

pyas us ki sirf bujhti hai hamare KHun se