خدا کا شکر کہ چھوٹی سی ہے خدا کی زمیں

خدا کا شکر کہ تم بھی اسی زمین پہ ہو

بھیجی تصویر بھی تو آنکھوں کی

یعنی آنکھیں دکھا رہی ہو مجھے

فکر تجدید ہجر ہے ورنہ

کب مجھے وصل کی ضرورت ہے

اس قدر قہقہے ہیں دنیا میں

شرم آتی ہے مجھ کو روتے ہوئے

یہ تو انسانیت کو ٹھوکر ہے

آدمی آدمی کا نوکر ہے

دعا ہے یہ رقیب بھی مری طرح ہی خوار ہو

میں چاہتا ہوں آپ کی رقیب سے بنی رہے

میں بدلتا ہوں روز اپنا ہدف

یہ مری مستقل مزاجی ہے

ریل کی پٹری پہ بھی لیٹے ہیں لوگ

یعنی پٹری سے اتر جاتے ہیں لوگ

تمام شہر میں بارش کی دھاک بیٹھ گئی

جو اڑ رہی تھی ہواؤں میں خاک بیٹھ گئی

گاڑی میں بھی گھر کو سوچے جاتا ہوں

گاڑی آگے اور میں پیچھے جاتا ہوں

وہ تھک گئی تھی بھیڑ میں چلتے ہوئے ظہورؔ

اس کے بدن پہ ان گنت آنکھوں کا بوجھ تھا

جمالیات کی شہ سرخیاں بھی پڑھ لینا

کتاب سینۂ دوشیزگاں بھی پڑھ لینا

درد کا احساس رکھا ہے فقط انسان میں

حیف دیمک جی رہی ہے میرؔ کے دیوان میں

کوئی بھی حل نہیں اداسی کا

مجھ سے کمرے نے بارہا پوچھا

ہمہ بیاض تھے ہر سمت قرمزی عارض

میں کیسے ساعد سیمیں پہ دستخط کرتا

کہیں کہیں سے جو کپڑوں میں بھی نہیں ڈھلتا

میں اس بدن کو بھی شعروں میں ڈھال لیتا ہوں

ظہورؔ کرنا ہے رن مبدل بہ کشت مجھ کو

میں اپنی تلوار کوٹ کر ہل بنا رہا ہوں

ان کے نقش قدم پہ چلنا ہے

وہ جو منزل پہ سر کے بل پہنچے

جینا ہے گر تو زخم لگا اپنے آپ کو

بچنے کو آندھیوں سے تو خیمے میں چھید کر