muddatoñ ḳhud se mulāqāt nahīñ hotī hai

raat hotī hai magar raat nahīñ hotī hai

muddaton KHud se mulaqat nahin hoti hai

raat hoti hai magar raat nahin hoti hai

fazā.eñ raqs meñ haiñ aur baras rahī hai sharāb

kisī ne jaam sū-e-asmāñ uchhālā hai

fazaen raqs mein hain aur baras rahi hai sharab

kisi ne jam su-e-asman uchhaala hai

mujh se nārāz bhī nahīñ hai vo

aur us ko manā rahā huuñ maiñ

mujh se naraaz bhi nahin hai wo

aur us ko mana raha hun main

us ne itnā kiyā nazar-andāz

sab kī nazroñ meñ aa ga.e haiñ ham

us ne itna kiya nazar-andaz

sab ki nazron mein aa gae hain hum

ek chehra tirā dekhne ke liye

kitne chehroñ se ham ko guzarnā paḌā

ek chehra tera dekhne ke liye

kitne chehron se hum ko guzarna paDa

sau baar TūTne pe bhī haarā nahīñ huuñ maiñ

miTTī kā ik charāġh huuñ taarā nahīñ huuñ maiñ

sau bar TuTne pe bhi haara nahin hun main

miTTi ka ek charagh hun tara nahin hun main

apne hone kā hai ehsās tire hone se

ġhair mumkin hai mirā tujh se judā ho jaanā

apne hone ka hai ehsas tere hone se

ghair mumkin hai mera tujh se juda ho jaana

mirā saaya bhī mujh se duur hai aur terī yādeñ bhī

maiñ ab is se ziyāda aur tanhā ho nahīñ saktā

mera saya bhi mujh se dur hai aur teri yaaden bhi

main ab is se ziyaada aur tanha ho nahin sakta

maiñ din ke ujāle meñ tujhe soch rahā huuñ

mahsūs ye hotā hai ki kuchh raushnī kam hai

main din ke ujale mein tujhe soch raha hun

mahsus ye hota hai ki kuchh raushni kam hai

duur tak āvāz de aaya huuñ maiñ

dekhnā ye hai ki aatā kaun hai

dur tak aawaz de aaya hun main

dekhna ye hai ki aata kaun hai

ab bhī raushan haiñ buzurgoñ kī havelī ke charāġh

ham kisī naqsh ko dhuñdlā nahīñ hone dete

ab bhi raushan hain buzurgon ki haweli ke charagh

hum kisi naqsh ko dhundla nahin hone dete

ishq kī kaun sī manzil pe junūñ laayā hai

hosh ḳhud aa ke ye kahtā hai mujhe hosh nahīñ

ishq ki kaun si manzil pe junun laya hai

hosh KHud aa ke ye kahta hai mujhe hosh nahin

pahle ruḳhsat huī chaman se bahār

aur ab ġhairat-e-chaman bhī ga.ī

pahle ruKHsat hui chaman se bahaar

aur ab ghairat-e-chaman bhi gai

guloñ kī tarah mahakte haiñ baaġh meñ kāñTe

ajiib rang meñ daur-e-bahār aaya hai

gulon ki tarah mahakte hain bagh mein kanTe

ajib rang mein daur-e-bahaar aaya hai

ehsān ḳhāk-e-sahrā pe majnūñ kā hai bahut

varna falak pe us kā pahuñchnā muhāl thā

ehsan KHak-e-sahra pe majnun ka hai bahut

warna falak pe us ka pahunchna muhaal tha