کچرے سے اٹھائی جو کسی طفل نے روٹی

پھر حلق سے میرے کوئی لقمہ نہیں اترا

جب وصل کا آئے گا ترے ساتھ صنم دن

اس دن کو حقیقت میں کہوں گا میں جنم دن

اس سے بڑھ کر اور کیا ہم پر ستم ہوگا منیرؔ

مشورہ مانگا ہے اس نے فیصلہ کرنے کے بعد

کنج حیرت سے چلے دشت زیاں تک لائے

کون لا سکتا ہے ہم دل کو جہاں تک لائے

کوئی بھی سر میں نہیں ہے منیرؔ کیا کیجے

یہ زندگی کا ترانہ ریاض مانگتا ہے

چراغ اندر کی سازشوں سے بجھے ہوئے ہیں

اور اس کا الزام بھی ہوا پر چلا گیا ہے

پڑ جاتے ہیں کتنے چھالے ہاتھوں میں

آتے ہیں پھر چند نوالے ہاتھوں میں

بوڑھے کمزور والدین کے ساتھ

جی رہا ہوں میں کتنے چین کے ساتھ

کیا خبر کون سا رستہ تری جانب نکلے

بے ارادہ بھی کئی بار سفر کرتے ہیں

کہاں سے ہم اپنی گردشوں کا جواز ڈھونڈیں

ہمارا محور زمیں کے محور سے مختلف ہے

میں آج تجھ سے ملاقات کرنے آیا ہوں

نئی غزل کی شروعات کرنے آیا ہوں

سپہ سالار کے جب ہاتھ کانپیں تو سپاہی بھی

زیادہ دیر پھر میدان میں ٹھہرا نہیں کرتے

ایک امید کے سہارے پر

کتنی تاخیر دیکھ لیتے ہیں

مسکرا کر اگر وہ دیکھے تو

آئنے پر نشان پڑ جائے

زمیں پہ صرف اتارا نہیں منیرؔ اس نے

پھر اس کے بعد ہمارا خیال بھی رکھا

کرنی پڑ جائے وضاحت پہ وضاحت لیکن

ہم تری بات کی تردید نہیں کر سکتے

پھر اپنی اس پریم کہانی پر آیا ڈک لائن

اب وہ مجھ کو جن کہتی ہے اور میں اس کو ڈائن

جو اہل عشق ہیں دیتے ہیں زور برگر پر

جو اہل حسن ہیں سپنے ڈنر کے دیکھتے ہیں

اسی لیے تو صحافیوں کو یہ پر تکلف ڈنر دیا ہے

کسی طرف سے نہ کوئی کڑوا سوال ہوگا یہ طے ہوا تھا

اگر ہے نیند نہ آنے کا عارضہ تجھ کو

تو بیڈ پہ لیٹ کے فوراً کوئی کتاب اٹھا

کیا ہوا ہے اسے ڈائٹنگ نے اتنا سلم

سو اس کی پکس کو ہم زوم کر کے دیکھتے ہیں

پولس کہاں سے ٹپک پڑی ہے کہا یہ ڈاکو نے سٹپٹا کر

مداخلت کا نہ رتی بھر احتمال ہوگا یہ طے ہوا تھا

پل بھر میں بنا دیتے ہیں باتوں کا بتنگڑ

رہتے ہیں سدا تاک میں احباب ہمارے

سنا تھا گنجے قسمت والے ہوتے ہیں

اور سنتے ہی سنتے عرصہ بیت گیا

کوئی پوچھے کہ کیسے امن قائم ہو اداروں میں

تو اس کی تان توڑیں گے یہ آدم زاد چھٹی پر

طے ہو چکی ہے اس سے جدائی مگر منیرؔ

تو اس کے ساتھ لمحۂ انکار تک تو چل

آئینہ دیکھیں تو غصہ آتا ہے

سر سے ٹوپی اترے عرصہ بیت گیا

کر گئی ہیں دو ہی خوراکیں مجھے چنگا بھلا

دید اس کی جیسے اینٹی بائیٹک کی ڈوز ہو

ہماری زلف سیہ کا بھرم نہ کھل جائے

بچا ہوا ہے جو پیالی میں وہ خضاب اٹھا

جیون ہے سڑک اور کنارے پہ کھڑے ہیں

لگتا ہے کہ مدت سے اشارے پہ کھڑے ہیں

قوم کے حق میں جو بھی تجاویز تھیں التوا میں رہیں

جن میں ذاتی مفادات تھے ان پہ فوراً عمل ہو گیا

صرف تھوڑا سا انہیں غصہ دلا دیتا ہوں میں

خود بنا لیتی ہے ماتھے پر شکن اپنی جگہ

کچھ وقت جو اس شخص کی صحبت میں گزارے

آئیں گی نظر صرف اسے دہر میں غزلیں

بیگم تیری اس سے زیادہ کیا تعریف کروں

کاش تمہارے جیسی مجھ کو مل جاتی اک اور

جس منظر کا حصہ تیری ذات نہیں

میری نظر میں اس کی کوئی اوقات نہیں

چائے کا تو ذکر ہی مت کیجیے

اب تو بس کالا ہے سب کچھ دال میں

پڑھی جب شاعری بے ساختہ منہ سے یہی نکلا

تکلف بر طرف اشعار سے تصویر بہتر ہے

بن گئے دولہے ہزاروں اپنے ہاتھوں میں پلے

ہم مگر ہو جائیں گے یوں ہی پرانے ہائے ہائے

سنی یہ بات تو بے ساختہ اک دل جلی بولی

انہی کے ساتھ رہنا ہے تو پھر جنت میں کیا جانا

اہل دل پہلے بدلتے ہیں نظر کا ذائقہ

بعد میں پھر لذت کام و دہن اپنی جگہ

یہ ایسی برق ہے اکثر جو میرے سر پہ گرتی ہے

نہیں ہے فرق اس میں اور بلائے ناگہانی میں

سارا ملبہ گرا نہ دیں مجھ پر

چل رہی ہے یہ افسران میں کیا

کوئی قریب سے بولا کہ فکر مت کیجے

یہ پانچ سال اسمبلی میں جا کے سوئے گا

جب کبھی سہ بار کانوں میں پڑے حرف قبول

دل پہ لگتے ہیں ہزاروں تازیانے ہائے ہائے

اک دوست مجھ سے کہنے لگا کچھ تو شرم کر

بکرے کے ساتھ اس نے اتاری ہیں سیلفیاں

لڑ رہا ہوں میں اکیلا کارزار ہست میں

کر فراہم تو بھی ظالم اپنے ہونے کا جواز

تم نے تو دس ہزار کا جوڑا پہن لیا

ٹوٹے ہوئے ہیں میرے بٹن تم کو اس سے کیا

گو حرف و اشک دونوں تھے سامان گفتگو

پھر بھی ہماری بات میں ابہام رہ گیا

بے چہرہ انسانوں کی اس بستی میں

اچھا ہے آئینے توڑ دئے جائیں

نکلی ہو پارلر سے فریش فیس لے کے تم

لگتا ہوں میں جو کالی چرن تم کو اس سے کیا