میں تو تھا موجود کتاب کے لفظوں میں

وہ ہی شاید مجھ کو پڑھنا بھول گیا

میں وہم ہوں کہ حقیقت یہ حال دیکھنے کو

گرفت ہوتا ہوں اپنا وصال دیکھنے کو

سفر نہ ہو تو یہ لطف سفر ہے بے معنی

بدن نہ ہو تو بھلا کیا قبا میں رکھا ہے

بند پڑے ہیں شہر کے سارے دروازے

یہ کیسا آسیب اب گھر گھر لگتا ہے

کب تک تو آسماں میں چھپ کے بیٹھے گا

مانگ رہا ہوں میں کب سے دعا باہر آ

بہت کہا تھا کہ تم اکیلے نہ رہ سکو گے

بہت کہا تھا کہ ہم کو یوں در بدر نہ کرنا

ان سے کیا رشتہ تھا وہ کیا میرے لگتے تھے

گرنے لگے جب پیڑ سے پتے تو میں رویا بہت

اس کو کھونا اصل میں اس کو پانا ہے

حاصل کا ہی پرتو ہے لا حاصل میں

ایک دیا دہلیز پہ رکھا بھول گیا

گھر کو لوٹ کے آنے والا بھول گیا

میں کس سے کرتا یہاں گفتگو کوئی بھی نہ تھا

نہیں تھا میرے مقابل جو تو کوئی بھی نہ تھا

سب کا دامن موتیوں سے بھرنے والے

میری آنکھ میں بھی اک آنسو رکھنا تھا

وہ بھی مجھ کو بھلا کے بہت خوش بیٹھا ہے

میں بھی اس کو چھوڑ کے طورؔ نہال ہوا

اک آگ سی اب لگی ہوئی ہے

پانی میں اثر کہاں سے آیا

ساری عمر کسی کی خاطر سولی پہ لٹکا رہا

شاید طورؔ میرے اندر اک شخص تھا زندہ بہت

دونوں بہر شعلۂ ذات دونوں اسیر انا

دریا کے لب پر پانی دشت کے لب پر پیاس

میں جب پیڑ سے گر کے زمیں کی خاک ہوا

تب اک عالم موہوم سمجھ میں آیا

کیوں مجھے محسوس یہ ہوتا ہے اکثر رات بھر

سینۂ شب پر چمکتا ہے سمندر رات بھر

خود ہی چراغ اب اپنی لو سے نالاں ہے

نقش یہ کیا ابھرا یہ کیسا زوال ہوا

یہ اسرار ہے ظاہر اس کے ہونے کا

منظر ہو یا پس منظر گہرا پانی

یہاں کسی کو کسی کی خبر نہیں درکار

عجب طرح کا یہ سارا جہان ہو گیا ہے