tamām umr tirā intizār kar leñge

magar ye ranj rahegā ki zindagī kam hai

tamam umr tera intizar kar lenge

magar ye ranj rahega ki zindagi kam hai

ek pal ke rukne se duur ho ga.ī manzil

sirf ham nahīñ chalte rāste bhī chalte haiñ

ek pal ke rukne se dur ho gai manzil

sirf hum nahin chalte raste bhi chalte hain

na saath deñgī ye dam toḌtī huī sham.eñ

na.e charāg jalāo ki raushnī kam hai

na sath dengi ye dam toDti hui shamen

nae charag jalao ki raushni kam hai

urūj-e-māh ko insāñ samajh gayā lekin

hanūz azmat-e-insāñ se āgahī kam hai

uruj-e-mah ko insan samajh gaya lekin

hanuz azmat-e-insan se aagahi kam hai

qarīb o duur se aatī hai aap kī āvāz

kabhī bahut hai ġham-e-justujū kabhī kam hai

qarib o dur se aati hai aap ki aawaz

kabhi bahut hai gham-e-justuju kabhi kam hai