aaj shayad koi milne aaya yahan

aaj shāyad koī milne aayā yahāñ

aa rahā hai nazar ek saayā yahāñ

imtihāñ aur legā ḳhudā kis qadar

mujh ko apnoñ ne nit āzmāyā yahāñ

nā-ḳhudā ne Dubone kī sāzish hī kī

mauj-e-dariyā ne mujh ko bachāyā yahāñ

kyā gila shahr meñ ham kareñ ġhair kā

zaḳhm apnoñ kī jānib se aayā yahāñ

bhuul hotī lakīroñ kī to ġham na thā

us ne hāthoñ se mujh ko miTāyā yahāñ

tark-e-ulfat kā un se gila kyā kareñ

dosh majbūriyoñ ko lagāyā yahāñ

itnā aahaT pe ho ḳhush na ai dil mire

khiḌkiyoñ ko havā ne hilāyā yahāñ

kin hisāboñ ko le kar tū baiThā hai dil

us ne ghar kab kisī kā basāyā yahāñ

baat hotī nasīboñ kī to Thiik thī

is vafā ko anā ne harāyā yahāñ

pyaas ko chheḌ saaqī hamārī na tū

mai-kadoñ ko hamīñ ne basāyā yahāñ

aaj shayad koi milne aaya yahan

aa raha hai nazar ek saya yahan

imtihan aur lega KHuda kis qadar

mujh ko apnon ne nit aazmaya yahan

na-KHuda ne Dubone ki sazish hi ki

mauj-e-dariya ne mujh ko bachaya yahan

kya gila shahr mein hum karen ghair ka

zaKHm apnon ki jaanib se aaya yahan

bhul hoti lakiron ki to gham na tha

us ne hathon se mujh ko miTaya yahan

tark-e-ulfat ka un se gila kya karen

dosh majburiyon ko lagaya yahan

itna aahaT pe ho KHush na ai dil mere

khiDkiyon ko hawa ne hilaya yahan

kin hisabon ko le kar tu baiTha hai dil

us ne ghar kab kisi ka basaya yahan

baat hoti nasibon ki to Thik thi

is wafa ko ana ne haraya yahan

pyas ko chheD saqi hamari na tu

mai-kadon ko hamin ne basaya yahan