aaKHiri bayanon mein aur na pesh-KHwani mein

āḳhirī bayānoñ meñ aur na pesh-ḳhvānī meñ

ham kahīñ nahīñ aate aap kī kahānī meñ

ham tamām raste par bārhā mile lekin

dekh hī nahīñ paa.e aap bad-gumānī meñ

iḳhtilāf kirnoñ kā uuprī dikhāvā thā

ek ho ga.e saare rang gahre paanī meñ

in se tum akele meñ guftugū kiyā karnā

lafz de ke jā.eñge ham tumheñ nishānī meñ

aaj vo parī-chehra baat kar gayā ham se

naam tak nahīñ pūchhā ham ne shādmānī meñ

ek baar rūThe to lauT kar nahīñ aa.e

chuuk ho ga.ī ham se apnī mezbānī meñ

tum zarā se zaḳhmoñ se tilmilā.e baiThe ho

sar kaTā.e baiThe haiñ log haq-bayānī meñ

aaKHiri bayanon mein aur na pesh-KHwani mein

hum kahin nahin aate aap ki kahani mein

hum tamam raste par barha mile lekin

dekh hi nahin pae aap bad-gumani mein

iKHtilaf kirnon ka upri dikhawa tha

ek ho gae sare rang gahre pani mein

in se tum akele mein guftugu kiya karna

lafz de ke jaenge hum tumhein nishani mein

aaj wo pari-chehra baat kar gaya hum se

nam tak nahin puchha hum ne shadmani mein

ek bar ruThe to lauT kar nahin aae

chuk ho gai hum se apni mezbani mein

tum zara se zaKHmon se tilmilae baiThe ho

sar kaTae baiThe hain log haq-bayani mein