aankhon dekhi hui KHun-rez kahani likh le

āñkhoñ dekhī huī ḳhūñ-rez kahānī likh le

ai vatan likh le koī yaad purānī likh le

aaj bhī kartā hai paiġhām-rasānī likh le

ye kabūtar hai agar shāh-jahānī likh le

shahr kī tujh ko havā raas to aatī bhī nahīñ

apne hisse meñ ye behtar hai kisānī likh le

vo javānī hai mayassar ki thamā.e na thame

terī marzī hai mire ḳhuun ko paanī likh le

dil kā rah jaa.e varaq yūñhī na saada saada

ai zuleḳhā tū use yūsuf-e-sānī likh le

maiñ huuñ ḳhāmosh to ye narm-mizājī hai mirī

mujh ko tālāb kā Thahrā huā paanī likh le

shā'irī terī 'avāmī ho 'avāmī 'saifī'

saḳht alfāz ke āsān ma'ānī likh le

aankhon dekhi hui KHun-rez kahani likh le

ai watan likh le koi yaad purani likh le

aaj bhi karta hai paigham-rasani likh le

ye kabutar hai agar shah-jahani likh le

shahr ki tujh ko hawa ras to aati bhi nahin

apne hisse mein ye behtar hai kisani likh le

wo jawani hai mayassar ki thamae na thame

teri marzi hai mere KHun ko pani likh le

dil ka rah jae waraq yunhi na sada sada

ai zuleKHa tu use yusuf-e-sani likh le

main hun KHamosh to ye narm-mizaji hai meri

mujh ko talab ka Thahra hua pani likh le

sha'iri teri 'awami ho 'awami 'saifi'

saKHt alfaz ke aasan ma'ani likh le