aap to chalte banenge de ke jine ki dua

aap to chalte baneñge de ke jiine kī du'ā

zindagī jo hashr kar degī hamārā us kā kyā

rog mere dil kā tere dil ko bhī lag jā.egā

chhūt kī bīmārī hai ye mat mire nazdīk aa

chhū ke guzrā thā ise patthar-sifat insāñ koī

aur phir dil TuuT kar bikhrā ba-shakl-e-ā.ina

chheḌte haiñ vasl ke lamhāt meñ zikr-e-firāq

lutf detā hai unheñ ham ko taḌapte dekhnā

gulsitān-e-ḳhvāb ho yā zindagī kā canvas

rang merī aañkh ke bikhre hue haiñ jā-ba-jā

hai hamāre jaisā koī is hujūm-e-'ām meñ

gar kabhī ḳhalvat mayassar ho to dil se pūchhnā

kah rahā thā aap kī āvāz meñ vo soz hai

duur jaise parbatoñ par giit gaatī sāhira

aap to chalte banenge de ke jine ki du'a

zindagi jo hashr kar degi hamara us ka kya

rog mere dil ka tere dil ko bhi lag jaega

chhut ki bimari hai ye mat mere nazdik aa

chhu ke guzra tha ise patthar-sifat insan koi

aur phir dil TuT kar bikhra ba-shakl-e-aina

chheDte hain wasl ke lamhat mein zikr-e-firaq

lutf deta hai unhen hum ko taDapte dekhna

gulsitan-e-KHwab ho ya zindagi ka canwas

rang meri aankh ke bikhre hue hain ja-ba-ja

hai hamare jaisa koi is hujum-e-'am mein

gar kabhi KHalwat mayassar ho to dil se puchhna

kah raha tha aap ki aawaz mein wo soz hai

dur jaise parbaton par git gati sahira