aap ziddi hum haTile ho gae

aap ziddī ham haTīle ho ga.e

ek hī ghar meñ qabīle ho ga.e

dushmanī pe jab nikhār aayā kiyā

dostī ke band Dhīle ho ga.e

uñgliyoñ meñ kyoñ jalan hone lagī

phuul bhī shāyad nukīle ho ga.e

raat āñkhoñ se bahut bārish huī

had huī takiye bhī giile ho ga.e

kaun sā jaadū havāoñ ne kiyā

jitne phal the sab rasīle ho ga.e

mausam-e-gul kā hai ye adnā kamāl

laḌkiyoñ ke haath piile ho ga.e

mai-kade se kyā ta'alluq aap kā

aap kyoñ 'saifī' nashīle ho ga.e

aap ziddi hum haTile ho gae

ek hi ghar mein qabile ho gae

dushmani pe jab nikhaar aaya kiya

dosti ke band Dhile ho gae

ungliyon mein kyon jalan hone lagi

phul bhi shayad nukile ho gae

raat aankhon se bahut barish hui

had hui takiye bhi gile ho gae

kaun sa jadu hawaon ne kiya

jitne phal the sab rasile ho gae

mausam-e-gul ka hai ye adna kamal

laDkiyon ke hath pile ho gae

mai-kade se kya ta'alluq aap ka

aap kyon 'saifi' nashile ho gae