aarzu husn ka shahkar bhi ho jati hai

aarzū husn kā shahkār bhī ho jaatī hai

aur kabhī naqsh-ba-dīvār bhī ho jaatī hai

ham to lab sī leñ magar is kā mudāvā kyā hai

ḳhāmushī ḳhud lab-e-guftār bhī ho jaatī hai

regzāroñ kī kaḌī dhuup musāfir ke liye

'ishrat-e-sāya-e-dīvār bhī ho jaatī hai

gulshan-e-‘aish se hushiyār ki shāḳh-e-nasrīñ

kabhī chaltī huī talvār bhī ho jaatī hai

loriyāñ de ke ḳhayāloñ ko sulāne vaalo

zindagī ḳhvāb se bedār bhī ho jaatī hai

maut vīrānī-e-ehsās ke sannāTe meñ

kabhī pāzeb kī jhankār bhī ho jaatī hai

zindagī ko hadaf-e-jabr banāne vaalo

zindagī barsar-e-paikār bhī ho jaatī hai

sham'-e-ummīd ke bujhne se na ghabrāo 'sirāj'

tīrgī bā'is-e-anvār bhī ho jaatī hai

aarzu husn ka shahkar bhi ho jati hai

aur kabhi naqsh-ba-diwar bhi ho jati hai

hum to lab si len magar is ka mudawa kya hai

KHamushi KHud lab-e-guftar bhi ho jati hai

regzaron ki kaDi dhup musafir ke liye

'ishrat-e-saya-e-diwar bhi ho jati hai

gulshan-e-‘aish se hushiyar ki shaKH-e-nasrin

kabhi chalti hui talwar bhi ho jati hai

loriyan de ke KHayalon ko sulane walo

zindagi KHwab se bedar bhi ho jati hai

maut virani-e-ehsas ke sannaTe mein

kabhi pazeb ki jhankar bhi ho jati hai

zindagi ko hadaf-e-jabr banane walo

zindagi barsar-e-paikar bhi ho jati hai

sham'-e-ummid ke bujhne se na ghabrao 'siraj'

tirgi ba'is-e-anwar bhi ho jati hai