آسان تو نہیں تھا سفر لوٹتے ہوئے

آسان تو نہیں تھا سفر لوٹتے ہوئے

دیکھے تھے کتنے ٹوٹتے گھر لوٹتے ہوئے

یہ شہر کی طلب مجھے جنگل سے لے گئی

لایا ہوں اپنے کاٹ کے پر لوٹتے ہوئے

لوگوں کے حادثوں نے مرا ڈر مٹا دیا

اب مٹ چکا ہے موت کا ڈر لوٹتے ہوئے

آتا ہے کوئی جب بھی کبھی اس کے شہر سے

میں پوچھتا ہوں خیر خبر لوٹتے ہوئے

چڑھتے ہوئے جو بات سمجھتے نہیں ہیں لوگ

کرتی ہے بات وہ ہی اثر لوٹتے ہوئے

میں لا رہا ہوں کیا یہ سبھی سوچنے لگے

رکھے ہوئے تھے مجھ پہ نظر لوٹتے ہوئے