abhi se ek kitab ke hisar mein ho tum sabhi

abhī se ik kitāb ke hisār meñ ho tum sabhī

ghise-piTe nisāb ke ḳhumār meñ ho tum sabhī

ye maiñ huuñ apnī gumrahī kī siidh meñ khaḌī huī

ki gardish-e-shahāb kī qatār meñ ho tum sabhī

'ajab nahīñ chaman se ruuTh jaa.eñ saarī ḳhushbueñ

jo is tarah gulāb ke shikār meñ ho tum sabhī

agar tumheñ lage vo hoñT jhuuT bolte nahīñ

to maan lo 'azāb kī pukār meñ ho tum sabhī

ḳhudā kisī bhī rabt kā subūt māñgtā nahīñ

vagarna kis hisāb ke shumār meñ ho tum sabhī

suno ai kā.enāt se pare ke silsilo suno

mire diye ḳhitāb ke madār meñ ho tum sabhī

ye raushnī ba-silsila bayād-e-raftagān hai

jame hue sarāb kī phuhār meñ ho tum sabhī

abhi se ek kitab ke hisar mein ho tum sabhi

ghise-piTe nisab ke KHumar mein ho tum sabhi

ye main hun apni gumrahi ki sidh mein khaDi hui

ki gardish-e-shahab ki qatar mein ho tum sabhi

'ajab nahin chaman se ruTh jaen sari KHushbuen

jo is tarah gulab ke shikar mein ho tum sabhi

agar tumhein lage wo honT jhuT bolte nahin

to man lo 'azab ki pukar mein ho tum sabhi

KHuda kisi bhi rabt ka subut mangta nahin

wagarna kis hisab ke shumar mein ho tum sabhi

suno ai kaenat se pare ke silsilo suno

mere diye KHitab ke madar mein ho tum sabhi

ye raushni ba-silsila bayaad-e-raftagan hai

jame hue sarab ki phuhaar mein ho tum sabhi