ابھی سے اک کتاب کے حصار میں ہو تم سبھی

ابھی سے اک کتاب کے حصار میں ہو تم سبھی

گھسے پٹے نصاب کے خمار میں ہو تم سبھی

یہ میں ہوں اپنی گمرہی کی سیدھ میں کھڑی ہوئی

کہ گردش شہاب کی قطار میں ہو تم سبھی

عجب نہیں چمن سے روٹھ جائیں ساری خوشبوئیں

جو اس طرح گلاب کے شکار میں ہو تم سبھی

اگر تمہیں لگے وہ ہونٹ جھوٹ بولتے نہیں

تو مان لو عذاب کی پکار میں ہو تم سبھی

خدا کسی بھی ربط کا ثبوت مانگتا نہیں

وگرنہ کس حساب کے شمار میں ہو تم سبھی

سنو اے کائنات سے پرے کے سلسلو سنو

مرے دیے خطاب کے مدار میں ہو تم سبھی

یہ روشنی بسلسلہ بیاد رفتگان ہے

جمے ہوئے سراب کی پھہار میں ہو تم سبھی