achchha to hai magar hamein achchha nahin laga

achchhā to hai magar hameñ achchhā nahīñ lagā

ye shahr jis meñ koī bhī apnā nahīñ lagā

marne ke intizār meñ baiThe the aaj bhī

number to lag rahe the par apnā nahīñ lagā

kaise uThā.e phirte haiñ jismoñ kā bojh sab

ham ko to dil kā bojh bhī halkā nahīñ lagā

ab haath mat lagā yūñhī ukhḌā rahe ye rang

ai zindagī tū ab mujhe chūnā nahīñ lagā

baiThe hue haiñ ḳhaak pe ḳhalvat kī chhāoñ meñ

sahrā bhī mere jaisoñ ko sahrā nahīñ lagā

ham hī samajh sake na kabhī zindagī ko yaar

jab tak tumhārī taar se jhaTkā nahīñ lagā

apnī jahāñ pahuñch thī vahāñ tak pahuñch ga.e

ye aur baat hai abhī katba nahīñ lagā

achchha to hai magar hamein achchha nahin laga

ye shahr jis mein koi bhi apna nahin laga

marne ke intizar mein baiThe the aaj bhi

number to lag rahe the par apna nahin laga

kaise uThae phirte hain jismon ka bojh sab

hum ko to dil ka bojh bhi halka nahin laga

ab hath mat laga yunhi ukhDa rahe ye rang

ai zindagi tu ab mujhe chuna nahin laga

baiThe hue hain KHak pe KHalwat ki chhaon mein

sahra bhi mere jaison ko sahra nahin laga

hum hi samajh sake na kabhi zindagi ko yar

jab tak tumhaari tar se jhaTka nahin laga

apni jahan pahunch thi wahan tak pahunch gae

ye aur baat hai abhi katba nahin laga