agar anjuman mein jagah nahin sar-e-rahguzar bhi na la mujhe

agar anjuman meñ jagah nahīñ sar-e-rahguzar bhī na lā mujhe

tire dil meñ gar na samā sakūñ to yuuñ ḳhaak meñ na milā mujhe

haiñ unheñ bhī mujh se shikāyateñ haiñ use bhī thoḌī kudūrateñ

na butoñ kī mujh pe 'ināyateñ na hī dekhtā hai ḳhudā mujhe

mirā fā.eda na rahā agar maiñ agar yahāñ pe be-sūd huuñ

so ġhubār huuñ to uḌā mujhe yā charāġh huuñ to bujhā mujhe

kahīñ maiñ hī rah se bhaTak gayā yā nazar zamāne kī lag ga.ī

so lihāzā dil meñ basā mujhe so nazar meñ apnī chhupā mujhe

mirā 'ishq hai jo 'urūj par mirī baat bhī jo hai mo'tabar

koī dostoñ kī hai bad-du'ā yā raqīb kī hai du'ā mujhe

mirā e'tirāf hai un se bhī mujhe e'tibār hai un pe bhī

rah-o-rasm aur jo baḌh ga.ī nazar aaya naqsh-e-vafā mujhe

na hī tāj-o-taḳht na māl-o-zar na to manzileñ na hī dasht-o-dar

tū hī chāhiye thā to mil gayā so ab aur chāhiye kyā mujhe

agar anjuman mein jagah nahin sar-e-rahguzar bhi na la mujhe

tere dil mein gar na sama sakun to yun KHak mein na mila mujhe

hain unhen bhi mujh se shikayaten hain use bhi thoDi kuduraten

na buton ki mujh pe 'inayaten na hi dekhta hai KHuda mujhe

mera faeda na raha agar main agar yahan pe be-sud hun

so ghubar hun to uDa mujhe ya charagh hun to bujha mujhe

kahin main hi rah se bhaTak gaya ya nazar zamane ki lag gai

so lihaza dil mein basa mujhe so nazar mein apni chhupa mujhe

mera 'ishq hai jo 'uruj par meri baat bhi jo hai mo'tabar

koi doston ki hai bad-du'a ya raqib ki hai du'a mujhe

mera e'tiraf hai un se bhi mujhe e'tibar hai un pe bhi

rah-o-rasm aur jo baDh gai nazar aaya naqsh-e-wafa mujhe

na hi taj-o-taKHt na mal-o-zar na to manzilen na hi dasht-o-dar

tu hi chahiye tha to mil gaya so ab aur chahiye kya mujhe