اے خدا تو بھی یہاں آئے تو جائے نہ بنے

اے خدا تو بھی یہاں آئے تو جائے نہ بنے

اب کہیں اور کوئی ایسی سرائے نہ بنے

وقت کو اپنی عمارت کا بھرم رکھنا ہے

ایسی دیوار اٹھا دی ہے کہ ڈھائے نہ بنے

روشنی ملگجی اور دھند بہت گہری تھی

لہرئیے آج تری یاد کے سائے نہ بنے

میرا اسلوب اسی بات کی کوشش تو نہیں

میرے بارے میں کسی کی کوئی رائے نہ بنے

چھوڑ کر ہم کو زمانے کا نکلنا دیکھو

دل بڑھے بھی تو قدم ہم سے بڑھائے نہ بنے

زندگی ایسی ہوا خواہ ہوس ہے کہ اجل

لاکھ چاہے کہ اسے اپنا بنائے نہ بنے

کچھ ہی اشعار ہیں غالبؔ کے نہیں جن کا جواب

باقی شعروں کے لیے شرح اٹھائے نہ بنے

کوئی چاہے کہ اسے ڈھونڈنے نکلیں سب لوگ

اس طرف جائے جدھر خلق سے جائے نہ بنے