ajab suKHan hai asar ka pata nahin chalta

'ajab suḳhan hai asar kā patā nahīñ chaltā

ki ismeñ zer-o-zabar kā patā nahīñ chaltā

na jaane kab mirī vahshat charāġh-pā ho jaa.e

mujh aise soḳhtā-sar kā patā nahīñ chaltā

bhaTak rahā huuñ maiñ kab se ḳhudā kī bastī meñ

dabīz dhund hai ghar kā patā nahīñ chaltā

kisī ko 'ilm hai apnī ik-ek sā'at kā

kisī ko shām-o-sahar kā patā nahīñ chaltā

zarā 'amīq nazar Dāliye ḳharābe par

ki aisī ḳhaak meñ zar kā patā nahīñ chaltā

nikāle kaun se dasht-o-daman se raahī ko

guzar kā rāhguzar kā patā nahīñ chaltā

ḳhalā meñ qaid nahīñ koī vaqt par 'āzar'

ḳhalā meñ shām-o-sahar kā patā nahīñ chaltā

'ajab suKHan hai asar ka pata nahin chalta

ki ismen zer-o-zabar ka pata nahin chalta

na jaane kab meri wahshat charagh-pa ho jae

mujh aise soKHta-sar ka pata nahin chalta

bhaTak raha hun main kab se KHuda ki basti mein

dabiz dhund hai ghar ka pata nahin chalta

kisi ko 'ilm hai apni ik-ek sa'at ka

kisi ko sham-o-sahar ka pata nahin chalta

zara 'amiq nazar Daliye KHarabe par

ki aisi KHak mein zar ka pata nahin chalta

nikale kaun se dasht-o-daman se rahi ko

guzar ka rahguzar ka pata nahin chalta

KHala mein qaid nahin koi waqt par 'azar'

KHala mein sham-o-sahar ka pata nahin chalta