andarun sarsari ek shor uTha hai mujh mein

andarūñ sarsarī ik shor uThā hai mujh meñ

aap hī koī balā huuñ yā balā hai mujh meñ

ātish-e-sozāñ meñ tabdīl hue jaatā hai

ik sharāra jo tah-e-ḳhāk chhupā hai mujh meñ

pusht pe bāñdh ke chaltī huuñ maiñ dushvārī ko

ġham-e-daurāñ tirā ambār lagā hai mujh meñ

saañs lete hue dam ghuTtā hai maddham maddham

kaisī ālūda-zada phailī fazā hai mujh meñ

jis ko maiñ chhoḌ ke aa.ī huuñ abhī maqtal meñ

us pe rone ko 'azādār paḌā hai mujh meñ

merā hai she'r magar mujh ko hī mā'lūm nahīñ

ye alamnāk sadā kis kī sadā hai mujh meñ

sar-e-manzar jo dikhā thā vo alag thā bilkul

pas-e-manzar jo dikhā hai vo nayā hai mujh meñ

andarun sarsari ek shor uTha hai mujh mein

aap hi koi bala hun ya bala hai mujh mein

aatish-e-sozan mein tabdil hue jata hai

ek sharara jo tah-e-KHak chhupa hai mujh mein

pusht pe bandh ke chalti hun main dushwari ko

gham-e-dauran tera ambar laga hai mujh mein

sans lete hue dam ghuTta hai maddham maddham

kaisi aaluda-zada phaili faza hai mujh mein

jis ko main chhoD ke aai hun abhi maqtal mein

us pe rone ko 'azadar paDa hai mujh mein

mera hai she'r magar mujh ko hi ma'lum nahin

ye alamnak sada kis ki sada hai mujh mein

sar-e-manzar jo dikha tha wo alag tha bilkul

pas-e-manzar jo dikha hai wo naya hai mujh mein