baghban mujhse KHafa tha be-samar hota tha main

bāġhbāñ mujh se ḳhafā thā be-samar hotā thā maiñ

thā to pahlā peḌ par āḳhir meñ tar hotā thā maiñ

jo guzartā paas se mere vo Takrātā zarūr

is qadar dikhtā nahīñ thā jis qadar hotā thā maiñ

kuchh na kuchh hotā hai sab meñ maiñ thā sab kā sab ḳhalā

us jagah kuchh bhī na hotā thā jidhar hotā thā maiñ

phir usī hālat kā naam ik roz hairānī paḌā

roz jis hālat meñ us ko dekh kar hotā thā maiñ

un dinoñ maiñ aur vīrānī the bilkul ek shai

sab chale jaate the ghar se aur ghar hotā thā maiñ

tere hote aur bhī kuchh ho ye nā-mumkin thā so

kuchh na honā honā mushkil thā magar hotā thā maiñ

mujh se ho kar sab nigāheñ us pe Tik jātīñ 'umair'

vo muzayyan kamra aur shīshe kā dar hotā thā maiñ

baghban mujh se KHafa tha be-samar hota tha main

tha to pahla peD par aaKHir mein tar hota tha main

jo guzarta pas se mere wo Takraata zarur

is qadar dikhta nahin tha jis qadar hota tha main

kuchh na kuchh hota hai sab mein main tha sab ka sab KHala

us jagah kuchh bhi na hota tha jidhar hota tha main

phir usi haalat ka nam ek roz hairani paDa

roz jis haalat mein us ko dekh kar hota tha main

un dinon main aur virani the bilkul ek shai

sab chale jate the ghar se aur ghar hota tha main

tere hote aur bhi kuchh ho ye na-mumkin tha so

kuchh na hona hona mushkil tha magar hota tha main

mujh se ho kar sab nigahen us pe Tik jatin 'umair'

wo muzayyan kamra aur shishe ka dar hota tha main