baDon mein baiThte uThte to chaalaki bhi aa jati

baḌoñ meñ baiThte uThte to chālākī bhī aa jaatī

hameñ dariyāoñ kī sohbat meñ tairākī bhī aa jaatī

ba-āsānī hamāre sar se Takrāte na yuuñ patthar

zamāne kī tarah ham meñ jo saffākī bhī aa jaatī

maiñ 'arz-e-hāl se mahrūm rahne kā na dukh sahtā

agar tarz-e-suḳhan ke saath bebākī bhī aa jaatī

vo merī dhaḌkanoñ kā karb agar mahsūs kar letā

mirī āñkhoñ meñ us ke ġham kī namnākī bhī aa jaatī

sabaq sīkhā na kuchh bhī Dhāñk ke pattoñ se fashion ne

vagarna qīmtī kapḌoñ ko poshākī bhī aa jaatī

ḳhulūs-e-dil se tauba kar ke chhuT jaate 'azāboñ se

gunah ashkoñ se dhul jaate to phir paakī bhī aa jaatī

mirā she'rī 'amal iḳhlās ke hāthoñ meñ hai varna

'vasīm' alfāz-o-mā'nī meñ ḳhatarnākī bhī aa jaatī

baDon mein baiThte uThte to chaalaki bhi aa jati

hamein dariyaon ki sohbat mein tairaki bhi aa jati

ba-asani hamare sar se Takraate na yun patthar

zamane ki tarah hum mein jo saffaki bhi aa jati

main 'arz-e-haal se mahrum rahne ka na dukh sahta

agar tarz-e-suKHan ke sath bebaki bhi aa jati

wo meri dhaDkanon ka karb agar mahsus kar leta

meri aankhon mein us ke gham ki namnaki bhi aa jati

sabaq sikha na kuchh bhi Dhank ke patton se fashion ne

wagarna qimti kapDon ko poshaki bhi aa jati

KHulus-e-dil se tauba kar ke chhuT jate 'azabon se

gunah ashkon se dhul jate to phir paki bhi aa jati

mera she'ri 'amal iKHlas ke hathon mein hai warna

'wasim' alfaz-o-ma'ni mein KHatarnaki bhi aa jati