بڑوں میں بیٹھتے اٹھتے تو چالاکی بھی آ جاتی

بڑوں میں بیٹھتے اٹھتے تو چالاکی بھی آ جاتی

ہمیں دریاؤں کی صحبت میں تیراکی بھی آ جاتی

بہ آسانی ہمارے سر سے ٹکراتے نہ یوں پتھر

زمانے کی طرح ہم میں جو سفاکی بھی آ جاتی

میں عرض حال سے محروم رہنے کا نہ دکھ سہتا

اگر طرز سخن کے ساتھ بے باکی بھی آ جاتی

وہ میری دھڑکنوں کا کرب اگر محسوس کر لیتا

مری آنکھوں میں اس کے غم کی نمناکی بھی آ جاتی

سبق سیکھا نہ کچھ بھی ڈھانک کے پتوں سے فیشن نے

وگرنہ قیمتی کپڑوں کو پوشاکی بھی آ جاتی

خلوص دل سے توبہ کر کے چھٹ جاتے عذابوں سے

گنہ اشکوں سے دھل جاتے تو پھر پاکی بھی آ جاتی

مرا شعری عمل اخلاص کے ہاتھوں میں ہے ورنہ

وسیمؔ الفاظ و معنی میں خطرناکی بھی آ جاتی