bahut bura hun meri jaan bahut bura hun main

bahut burā huuñ mirī jaañ bahut burā huuñ maiñ

ḳhulūs dekh mirā ḳhud ye kah rahā huuñ maiñ

kuchh ik burā.iyāñ mujh meñ azal se Thahrī haiñ

kuchh is zamāne meñ aa kar burā huā huuñ maiñ

ye shā.irī nahīñ dar-asl ek parda hai

baġhair shor kiye jis meñ chīḳhtā huuñ maiñ

agar kisī ko milūñ to mujhe ḳhabar kar de

patā chalā hai ki kuchh din se gum-shuda huuñ maiñ

guzarte vaqt kī aadat hai sab badal denā

jahāñ kabhī maiñ ziyāda thā ab zarā huuñ maiñ

mujhe samajhnā bhalā sab kī dastaras meñ kahāñ

koī kahānī maiñ thoḌī huuñ falsafa huuñ maiñ

zarā sā vaqt hai phir vaqt hī batā.egā

ki sach meñ kaun huuñ kaisā huuñ aur kyā huuñ maiñ

bahut bura hun meri jaan bahut bura hun main

KHulus dekh mera KHud ye kah raha hun main

kuchh ek buraiyan mujh mein azal se Thahri hain

kuchh is zamane mein aa kar bura hua hun main

ye shairi nahin dar-asl ek parda hai

baghair shor kiye jis mein chiKHta hun main

agar kisi ko milun to mujhe KHabar kar de

pata chala hai ki kuchh din se gum-shuda hun main

guzarte waqt ki aadat hai sab badal dena

jahan kabhi main ziyaada tha ab zara hun main

mujhe samajhna bhala sab ki dastaras mein kahan

koi kahani main thoDi hun falsafa hun main

zara sa waqt hai phir waqt hi bataega

ki sach mein kaun hun kaisa hun aur kya hun main