bijli kaDki baadal garja kas-bal ek hua

bijlī kaḌkī bādal garjā kas-bal ek huā

itnī bārish barsī mujh meñ jal-thal ek huā

do 'āshiq the un āñkhoñ ke donoñ kāmil the

ek huā begāna ḳhud se pāgal ek huā

jis ne girah lagā.ī us kā māthā chūmnā hai

kaisī hunar-mandī se TaaT aur maḳhmal ek huā

fard hue maujūd zamāne sard añdhere meñ

dil ke ḳhalā meñ aaj hamārā pal-pal ek huā

raat falak par nazar jamā.e guzar ga.ī apnī

itne sitāroñ meñ kyoñ āḳhir ojhal ek huā

donoñ baazū ek hī vazn sahārā karte the

koī mujhe samjhā saktā hai kyoñ shal ek huā

rang ko apnī sāñseñ denā sahl nahīñ hotā 'āzar'

saarī 'umr meñ mujh se manzar saiqal ek huā

bijli kaDki baadal garja kas-bal ek hua

itni barish barsi mujh mein jal-thal ek hua

do 'ashiq the un aankhon ke donon kaamil the

ek hua begana KHud se pagal ek hua

jis ne girah lagai us ka matha chumna hai

kaisi hunar-mandi se TaT aur maKHmal ek hua

fard hue maujud zamane sard andhere mein

dil ke KHala mein aaj hamara pal-pal ek hua

raat falak par nazar jamae guzar gai apni

itne sitaron mein kyon aaKHir ojhal ek hua

donon bazu ek hi wazn sahaara karte the

koi mujhe samjha sakta hai kyon shal ek hua

rang ko apni sansen dena sahl nahin hota 'azar'

sari 'umr mein mujh se manzar saiqal ek hua