بجلی کڑکی بادل گرجا کس بل ایک ہوا

بجلی کڑکی بادل گرجا کس بل ایک ہوا

اتنی بارش برسی مجھ میں جل تھل ایک ہوا

دو عاشق تھے ان آنکھوں کے دونوں کامل تھے

ایک ہوا بیگانہ خود سے پاگل ایک ہوا

جس نے گرہ لگائی اس کا ماتھا چومنا ہے

کیسی ہنر مندی سے ٹاٹ اور مخمل ایک ہوا

فرد ہوئے موجود زمانے سرد اندھیرے میں

دل کے خلا میں آج ہمارا پل پل ایک ہوا

رات فلک پر نظر جمائے گزر گئی اپنی

اتنے ستاروں میں کیوں آخر اوجھل ایک ہوا

دونوں بازو ایک ہی وزن سہارا کرتے تھے

کوئی مجھے سمجھا سکتا ہے کیوں شل ایک ہوا

رنگ کو اپنی سانسیں دینا سہل نہیں ہوتا آزرؔ

ساری عمر میں مجھ سے منظر صیقل ایک ہوا