چاند ستارے مٹھی میں تھے سورج سے یارانہ تھا

چاند ستارے مٹھی میں تھے سورج سے یارانہ تھا

کیا دن تھے جب خواب نگر میں اپنا آنا جانا تھا

اک جادو سا جیسے میری ہر دھڑکن میں اترا تھا

مجھ کو خود معلوم نہیں میں کیوں اتنا دیوانہ تھا

سب مجھ کو سودائی کہہ کر تجھ کو رسوا کرتے تھے

نظریں میری اور تھیں لیکن تیری اور نشانہ تھا

جانے کیسا شخص تھا باتیں دیوانوں سی کرتا تھا

خوابیدہ آنکھیں تھیں لب پر پریوں کا افسانہ تھا

ایک کہانی جس میں شاید سب کچھ طے تھا پہلے سے

ایک فسانہ جس میں سب کچھ مل کر بھی کھو جانا تھا

تجھے مکمل کرنا تھا اک حصہ میرے قصے کا

مجھ کو تیرے افسانے میں اک کردار نبھانا تھا

بھیڑ سے باہر آ کر دیکھا تھا دنیا کے میلے کو

ساری چہل پہل کے پیچھے جاں لیوا ویرانہ تھا

آخر تھک کر چھوڑ دیا ہستی کی الجھی گتھی کو

سلجھانے کی کوشش کرنا اور اسے الجھانا تھا