ہمیں پہ رنج و الم گو ہزار گزرے ہیں

ہمیں پہ رنج و الم گو ہزار گزرے ہیں

جہاں سے گزرے ہیں ہم نغمہ بار گزرے ہیں

حریم ناز سے ہم ہوشیار گزرے ہیں

مگر وہ دل سے تو بے اختیار گزرے ہیں

زباں زباں پہ ہے مہر و وفا کے افسانے

جہاں جہاں سے ترے جاں نثار گزرے ہیں

نظر نظر نے ہے چوما دلوں نے چاہا ہے

جو رہ گزر سے تری دل فگار گزرے ہیں

خیال و فکر کی وہ رفعتوں کو چھو کے گئے

تری نظر سے جو یہ خاکسار گزرے ہیں

مہک مہک سی گئی بوئے پیرہن سے فضا

کہ آج ادھر سے وہ جان بہار گزرے ہیں

یہ خون دل ہے جو آنکھوں کی راہ بہہ نکلا

کہا یہ کس نے کہ ہم اشک بار گزرے ہیں

رلائے کیوں نہ ہمیں اب قفس میں یاد ان کی

وہ رات دن جو سر شاخسار گزرے ہیں

حبیبؔ میری نگاہوں سے ہو وہ لاکھ نہاں

وہ میرے دل سے مگر بار بار گزرے ہیں