ik-duje ke basi un ko aur basera kya malum

ik-dūje ke baasī un ko aur baserā kyā ma.alūm

apne-pan ke bāshindoñ ko merā terā kyā ma.alūm

sūraj bole to so jaa.eñ sūraj bole to jāgeñ

kyā jāneñ ye diyā jalānā un ko añdherā kyā ma.alūm

ḳhvāb kā jhuuT jīvan sach meñ til til marnā jin kā bhaag

ye rātoñ ke qaidī un ko sāñjh saverā kyā ma.alūm

bastī se bāhar sāñpoñ ne bhī to kuchh phūñkā hogā

aadhī raah se lauTā ho mehmān saperā kyā ma.alūm

bāñdhī thiiñ āshā.eñ kyā kyā ham ne ab ke mausam se

'rahmānī' ab kaun sī rut meñ phūle bahīrā kyā ma.alūm

ik-duje ke basi un ko aur basera kya malum

apne-pan ke bashindon ko mera tera kya malum

suraj bole to so jaen suraj bole to jagen

kya jaanen ye diya jalana un ko andhera kya malum

KHwab ka jhuT jiwan sach mein til til marna jin ka bhag

ye raaton ke qaidi un ko sanjh sawera kya malum

basti se bahar sanpon ne bhi to kuchh phunka hoga

aadhi rah se lauTa ho mehman sapera kya malum

bandhi thin aashaen kya kya hum ne ab ke mausam se

'rahmani' ab kaun si rut mein phule bahira kya malum