qafiye ki band galiyon ka gadagar kar diya

qāfiye kī band galiyoñ kā gadāgar kar diyā

us ne kaise kaam par mujh ko muqarrar kar diyā

ham ka.ī the aur hamāre rāste bhī the ka.ī

vo akelā thā so us ne mā'raka sar kar diyā

jis ne chorī kī thī sau pachchās par chhoḌā use

jo saḌak par jā rahā thā us ko andar kar diyā

chhat zamīñ par aa rahī nāzuk the shahtīr is qadar

gir paḌī dīvār bhī aisā palastar kar diyā

raushnī ab raah se bhaTkā bhī detī hai miyāñ

us kī āñkhoñ kī chamak ne mujh ko be-ghar kar diyā

jhūTh-mūTh āḳhir gale mil kar ba-zo'm-e-ḳhud 'zafar'

aglā pichhlā sab hisāb us ne barābar kar diyā

qafiye ki band galiyon ka gadagar kar diya

us ne kaise kaam par mujh ko muqarrar kar diya

hum kai the aur hamare raste bhi the kai

wo akela tha so us ne ma'raka sar kar diya

jis ne chori ki thi sau pachchas par chhoDa use

jo saDak par ja raha tha us ko andar kar diya

chhat zamin par aa rahi nazuk the shahtir is qadar

gir paDi diwar bhi aisa palastar kar diya

raushni ab rah se bhaTka bhi deti hai miyan

us ki aankhon ki chamak ne mujh ko be-ghar kar diya

jhuTh-muTh aaKHir gale mil kar ba-zo'm-e-KHud 'zafar'

agla pichhla sab hisab us ne barabar kar diya