قافیے کی بند گلیوں کا گداگر کر دیا

قافیے کی بند گلیوں کا گداگر کر دیا

اس نے کیسے کام پر مجھ کو مقرر کر دیا

ہم کئی تھے اور ہمارے راستے بھی تھے کئی

وہ اکیلا تھا سو اس نے معرکہ سر کر دیا

جس نے چوری کی تھی سو پچاس پر چھوڑا اسے

جو سڑک پر جا رہا تھا اس کو اندر کر دیا

چھت زمیں پر آ رہی نازک تھے شہتیر اس قدر

گر پڑی دیوار بھی ایسا پلستر کر دیا

روشنی اب راہ سے بھٹکا بھی دیتی ہے میاں

اس کی آنکھوں کی چمک نے مجھ کو بے گھر کر دیا

جھوٹ موٹھ آخر گلے مل کر بہ زعم خود ظفرؔ

اگلا پچھلا سب حساب اس نے برابر کر دیا