رنگوں کا تمنائی نہ سودائی ہوں رس کا

رنگوں کا تمنائی نہ سودائی ہوں رس کا

نشہ ہے مرے خوں میں ابھی موت کے مس کا

بیٹھا ہوں کسی اور صدا کے لئے ورنہ

گزرا ہے مرے سر سے بھی آوازہ جرس کا

ہے روح کا شب شور تلاطم تو بڑی چیز

یہ جسم کا جوہڑ ہی نہیں ہے مرے بس کا

بہتا ہوا پتہ تھا کوئی موج رواں پر

چڑھتا ہوا سر میں کوئی دریا تھا ہوس کا

نکلا ہوں نیا ہو کے سمندر کے سفر پر

پیشانی سے ہر داغ دھلا پچھلے برس کا

اس طرح ظفرؔ سب کو ہوا قید کرے گی

دے گا نہ دکھائی کہیں دروازہ قفس کا