talluqat ke tohfe sanbhaal kar rakhna

ta'alluqāt ke tohfe sañbhāl kar rakhnā

mile haiñ zaḳhm jo gahre sañbhāl kar rakhnā

sukūn dete haiñ tanhā.iyoñ ke mausam meñ

tamām dard ke rishte sañbhāl kar rakhnā

koī na qadr kare is kā ġham na karnā kabhī

diloñ meñ pyaar ke jazbe sañbhāl kar rakhnā

mahakte lamhoñ kā ehsās hogā āñgan meñ

shagufta phūloñ ke gamle sañbhāl kar rakhnā

vabāl-e-jāñ na kahīñ ġhaflatoñ se ban jaa.eñ

jadīd daur ke bachche sañbhāl kar rakhnā

kabhī libās-e-haqīqat pahan bhī sakte haiñ

tum apnī āñkhoñ meñ sapne sañbhāl kar rakhnā

zarā sī der meñ baazī palaT bhī saktī hai

diloñ ke khel meñ mohre sañbhāl kar rakhnā

tumhāre haath meñ hoñge to chal bhī jā.eñge

purāne daur ke sikke sañbhāl kar rakhnā

nichoḌ kar jo ragoñ se maiñ de rahā huuñ tumheñ

mire lahū ke vo qatre sañbhāl kar rakhnā

hamārī yaad meñ niklā huā har ik aañsū

ki jaise motī ho aise sañbhāl kar rakhnā

yaqīn jāniye tahzīb kī zamānat haiñ

'sahar' ne jo kahe jumle sañbhāl kar rakhnā

ta'alluqat ke tohfe sanbhaal kar rakhna

mile hain zaKHm jo gahre sanbhaal kar rakhna

sukun dete hain tanhaiyon ke mausam mein

tamam dard ke rishte sanbhaal kar rakhna

koi na qadr kare is ka gham na karna kabhi

dilon mein pyar ke jazbe sanbhaal kar rakhna

mahakte lamhon ka ehsas hoga aangan mein

shagufta phulon ke gamle sanbhaal kar rakhna

wabaal-e-jaan na kahin ghaflaton se ban jaen

jadid daur ke bachche sanbhaal kar rakhna

kabhi libas-e-haqiqat pahan bhi sakte hain

tum apni aankhon mein sapne sanbhaal kar rakhna

zara si der mein bazi palaT bhi sakti hai

dilon ke khel mein mohre sanbhaal kar rakhna

tumhaare hath mein honge to chal bhi jaenge

purane daur ke sikke sanbhaal kar rakhna

nichoD kar jo ragon se main de raha hun tumhein

mere lahu ke wo qatre sanbhaal kar rakhna

hamari yaad mein nikla hua har ek aansu

ki jaise moti ho aise sanbhaal kar rakhna

yaqin jaaniye tahzib ki zamanat hain

'sahar' ne jo kahe jumle sanbhaal kar rakhna