آخری دن

ہجر سے پریشاں ہم

زندگی سے گھبرا کر

خامشی کی چادر میں

دور تک چلے آئے

شور میں نکل آئے

شور نے سلیقے سے

دھیمے دھیمے سمجھایا

زندگی خموشی سے

آگے کی کہانی ہے

چائے کی دکانوں میں

سرمئی گلاسوں کی

‎کھڑکھڑاہٹیں اکثر

کتنا لطف دیتی ہیں

شور ہی تو ہے یہ بھی

چوک پہ کھڑے لڑکے

جب کسی لطیفے پہ

قہقہے لگاتے ہیں

تالیاں بجاتے ہیں

تالیوں کی آوازیں

شور ہی تو کرتی ہیں

آنکھ باتیں کرتی ہیں

دل صدائیں دیتا ہے

سانس آتی جاتی ہے

اک ردم سا بنتا ہے

مختلف دھنیں بھی تو

شور کی زبانیں ہیں

اب سمجھ میں آیا ہے

یہ اداس سناٹا

شور ہی کا حصہ ہے

خامشی یا تنہائی

مختصر سا قصہ ہے

سو یہی کیا ہے طے

ہجر کا ترے جاناں

آج آخری دن ہے

کل سے اس خرابے میں

شور کے دو آبے میں

نوکری کریں گے ہم

عاشقی کریں گے ہم

شاعری کریں گے ہم