an-kaha dukh

zaḳhm siine pe lagte haiñ lagte raheñ

ashk āñkhoñ meñ chhupte haiñ chhupte raheñ

par ka.ī zaḳhm aise bhī dil par lage

jin ko ginte hue ḳhauf Dasne lage

mere siine pe bhī zaḳhm aisā hai ik

jis kā shikva kisī se nahīñ

jis kā charchā kahīñ bhī nahīñ

merī apnī bhī ehsās kī raah meñ

zikr us kā nahīñ

phir bhī us dard kī Tiis se

jā-ba-jā is badan par ḳharāsheñ lagīñ

ḳhuun ristā rahā

zaḳhm baḌhtā rahā

ek nanhā sā dukh

chupke chupke kahīñ

merī gahrā.ī meñ

merī tanhā.ī meñ

sar uThātā rahā

mujh meñ jaltā rahā

ek ḳhushbū jo mil na sakī

apnī kah na sakī merī sun na sakī

ik kalī vo jo khilne se pahle hī murjhā ga.ī

jaane kis kī nazar khā ga.ī

saañs lene se pahle hī

kumhlā ga.ī

mujh ko jhulsā ga.ī

zaKHm sine pe lagte hain lagte rahen

ashk aankhon mein chhupte hain chhupte rahen

par kai zaKHm aise bhi dil par lage

jin ko ginte hue KHauf Dasne lage

mere sine pe bhi zaKHm aisa hai ek

jis ka shikwa kisi se nahin

jis ka charcha kahin bhi nahin

meri apni bhi ehsas ki rah mein

zikr us ka nahin

phir bhi us dard ki Tis se

ja-ba-ja is badan par KHarashen lagin

KHun rista raha

zaKHm baDhta raha

ek nanha sa dukh

chupke chupke kahin

meri gahrai mein

meri tanhai mein

sar uThata raha

mujh mein jalta raha

ek KHushbu jo mil na saki

apni kah na saki meri sun na saki

ek kali wo jo khilne se pahle hi murjha gai

jaane kis ki nazar kha gai

sans lene se pahle hi

kumhla gai

mujh ko jhulsa gai