bayaad-e-faiz ahmad faiz

vo chaman meñ jis ne kalī kalī ko mizāj-e-bād-e-sabā diyā

vo har ek ġhunche ke lab ko jis ne hai ik shu'ūr-e-navā diyā

vo har ek haal meñ basta-lab na kisī se shikva na kuchh talab

ġham-e-'āshiqī tirī ḳhair ho tujhe yādgār banā diyā

vo sharīk-e-bazm-e-saman-barāñ vo sahīm-e-kulfat-e-be-kasāñ

dil-e-reza-reza ko jis ne apne ravish ravish pe luTā diyā

rahā kaj jabīñ pe sar-e-kafan vahī hausla vahī bāñkpan

pas-e-marg mailā nahīñ kafan ye ajal ko saaf batā diyā

jise qaid-o-band ke marhale na rah-e-vafā se haTā sake

ba-hama shaqāvat-e-dushmanāñ bhī payām-e-sidq-o-safā diyā

vo jo chāra-sāz-e-jahāñ rahā jo sharīk-e-dard-e-nihāñ rahā

jo vatan kī rūh-e-ravāñ rahā use ham ne kitnā bhulā diyā

vo shahīd-e-sheva-e-dilbarī vo qatīl-e-nāvak-e-dostī

vo ḳhatīb-e-mimbar-e-āshtī use apnī qaum ne kyā diyā

wo chaman mein jis ne kali kali ko mizaj-e-baad-e-saba diya

wo har ek ghunche ke lab ko jis ne hai ek shu'ur-e-nawa diya

wo har ek haal mein basta-lab na kisi se shikwa na kuchh talab

gham-e-'ashiqi teri KHair ho tujhe yaadgar bana diya

wo sharik-e-bazm-e-saman-baran wo sahim-e-kulfat-e-be-kasan

dil-e-reza-reza ko jis ne apne rawish rawish pe luTa diya

raha kaj jabin pe sar-e-kafan wahi hausla wahi bankpan

pas-e-marg maila nahin kafan ye ajal ko saf bata diya

jise qaid-o-band ke marhale na rah-e-wafa se haTa sake

ba-hama shaqawat-e-dushmanan bhi payam-e-sidq-o-safa diya

wo jo chaara-saz-e-jahan raha jo sharik-e-dard-e-nihan raha

jo watan ki ruh-e-rawan raha use hum ne kitna bhula diya

wo shahid-e-shewa-e-dilbari wo qatil-e-nawak-e-dosti

wo KHatib-e-mimbar-e-ashti use apni qaum ne kya diya