بیاد فیض احمد فیضؔ

وہ چمن میں جس نے کلی کلی کو مزاج باد صبا دیا

وہ ہر ایک غنچے کے لب کو جس نے ہے اک شعور نوا دیا

وہ ہر ایک حال میں بستہ لب نہ کسی سے شکوہ نہ کچھ طلب

غم عاشقی تری خیر ہو تجھے یادگار بنا دیا

وہ شریک بزم سمن براں وہ سہیم کلفت بے کساں

دل ریزہ ریزہ کو جس نے اپنے روش روش پہ لٹا دیا

رہا کج جبیں پہ سر کفن وہی حوصلہ وہی بانکپن

پس مرگ میلا نہیں کفن یہ اجل کو صاف بتا دیا

جسے قید و بند کے مرحلے نہ رہ وفا سے ہٹا سکے

بہ ہمہ شقاوت دشمناں بھی پیام صدق و صفا دیا

وہ جو چارہ ساز جہاں رہا جو شریک درد نہاں رہا

جو وطن کی روح رواں رہا اسے ہم نے کتنا بھلا دیا

وہ شہید شیوۂ دلبری وہ قتیل ناوک دوستی

وہ خطیب منبر آشتی اسے اپنی قوم نے کیا دیا