beTi ka KHat abbu ke nam

pyāre abbū aap ko merā salām

aap ko rakkhe sadā rab shād-kām

daadā daadī bhī haiñ behad ḳhush yahāñ

ḳhairiyat se haiñ bahan aur bhaa.ī maañ

ḳhairiyat se aap bhī hoñge vahāñ

hai hameñ is baat kā puurā gumāñ

kal savere hī milā ḳhat aap kā

mil ke ham sab ne paḌhā ḳhat aap kā

aap ke ḳhat kā hameñ thā intizār

der hone ke sabab the be-qarār

kyā ḳhabar hai aap ko abbū miyāñ

ham yahāñ haiñ dil hamārā hai vahāñ

paḌh ke ḳhat ab mil gayā ham ko sukūñ

miT chuke haiñ saare afkār-e-darūñ

haal ghar kā ab bayāñ kartī huuñ maiñ

aap par sab kuchh 'ayāñ kartī huuñ maiñ

har tarah se hai yahāñ amn-o-amāñ

chal rahā hai zindagī kā kārvāñ

ham sabhī bhaa.ī bahan haiñ shādmāñ

aap jo ham par haiñ itne mehrbāñ

ik ḳhabar sun lījiye rāhat-rasā

nāzrā merā mukammal ho gayā

qā'eda bhaa.ī kā bhī puurā huā

ham ko bhī kuchh chāhiye is kā sila

ab ke maiñ schōl meñ avval rahī

jis se do-bālā huī maañ kī ḳhushī

aap bhī ḳhush hoñge aisā hai yaqīñ

paḌh ke ye tahrīr merī dil-nashīñ

is liye jab aa.eñ tohfa saath ho

phal ye mehnat kā hamāre haath ho

band ho ab guftugū kā silsila

vaqt aa pahuñchā mire schōl kā

pyāre abbū ab ijāzat dījiye

ham phaleñ phūleñ du'ā.eñ kījiye

apne is ḳhat ko maiñ kartī huuñ tamām

aap ko beTī 'farīha' kā salām

pyare abbu aap ko mera salam

aap ko rakkhe sada rab shad-kaam

dada dadi bhi hain behad KHush yahan

KHairiyat se hain bahan aur bhai man

KHairiyat se aap bhi honge wahan

hai hamein is baat ka pura guman

kal sawere hi mila KHat aap ka

mil ke hum sab ne paDha KHat aap ka

aap ke KHat ka hamein tha intizar

der hone ke sabab the be-qarar

kya KHabar hai aap ko abbu miyan

hum yahan hain dil hamara hai wahan

paDh ke KHat ab mil gaya hum ko sukun

miT chuke hain sare afkar-e-darun

haal ghar ka ab bayan karti hun main

aap par sab kuchh 'ayan karti hun main

har tarah se hai yahan amn-o-aman

chal raha hai zindagi ka karwan

hum sabhi bhai bahan hain shadman

aap jo hum par hain itne mehrban

ek KHabar sun lijiye rahat-rasa

nazra mera mukammal ho gaya

qa'eda bhai ka bhi pura hua

hum ko bhi kuchh chahiye is ka sila

ab ke main school mein awwal rahi

jis se do-baala hui man ki KHushi

aap bhi KHush honge aisa hai yaqin

paDh ke ye tahrir meri dil-nashin

is liye jab aaen tohfa sath ho

phal ye mehnat ka hamare hath ho

band ho ab guftugu ka silsila

waqt aa pahuncha mere school ka

pyare abbu ab ijazat dijiye

hum phalen phulen du'aen kijiye

apne is KHat ko main karti hun tamam

aap ko beTi 'fariha' ka salam